Aizawl August 19, 2024 : Congress chuan tunhnaiah BSUP, Edenthar-a cheng te vau na anga ngaih theihin Home Minister K. Sapdanga chuan Edenthar ZPM Group, Edenthara ZPM ho Whatsapp group-ah a comment chu social media-ah thehdarh a ni a. Hetianga voters te vauna tawngkam ang hi tunhma in Mizoram Politics-ah an la hmelhriat ngai lova, hetiang thil a thleng hi a pawi an tih thu thuchhuah an siamah an tarlang.

Congress chuan, "Edenthar BSUP hi tunhnaia Bye-Election neihna tur AMC Ward XII huamchhunga awm a ni a. An bialtu MLA, Home Minister ni bawkin anmahni rikrap leh vau ang zawnga tawngkam a nei hi mi rethei leh harsa zawk te hmuhsitna leh hnuaichhiahna, an duh duh vote thei tura zalenna an neih, Right to Vote palzut tumna ah kan ngai a. Model Code of Conduct bawhchhiatna ni mai lovin invauna(intimidation) a tel avangin Representation of People Act, 1951 bawhchhiatna a tling a ni," an ti.

"Congress party in mirethei kan vau ve ngai lo va, mirethei sawrkar kan din thin a, mirethei ten leirem an rah theih nan, mirethei te tan policy leh programme kan siam thin. Mirethei te vau hi kan tih ve ngai loh a ni."

"Keini Congress party chuan BSUP a chengte thlavang kan hauh tlat dawn a, Right to Vote an duh duh vote theih tura zalenna an neih hi kan humhim sak tlat dawn a, an chunga vauna leh rikrapna te a thlen kan phal dawn lo a ni," an ti bawk.