ZALEN, Mar. 26, 2025: Mizoram State Commission for Women chuan Basic Services to the Urban Poor (BSUP), Edenthar, Aizawla buainaah Nilaini khan suo moto a siam.

Thupeka tar lan a nih dan chuan, “Social media kaltlangin hmeichhe rual kawngpui (public place)-a insual buai lai video dawn a ni a, he video hi ngaih thu tak ngai tak niin a lang,” an ti.

“Hetianga ual-au taka insual buaina hi hmeichhe zahawmna tihbawrhbanna niin, hetiang thil hi thleng zui tawh lo tura rang taka hmalak zui a ngaiin he video-a lo lang hi a dik em tihte pawh finfiah ngai niin a lang a. Thudawn danin he thil thleng hi BSUP Complex, Edenthar, Aizawla thleng nia sawi a ni a. He thil hi a lo dik ngei a nih chuan anni lakah pawh dan anga hmalak ngei a tha nia hriat a ni,” an ti.

Hetiang a nih avang hian Mizoram State Commission for Women chuan he thil thleng hi case-ah ziak lutin MSCW Case No. 12/2025 (Suo moto)-in a ziak lut tih an tar lang.

Superintendent of Police, Aizawl district chu dan anga thubuai ziah luh a nih theih nan hma la turin an beisei tih an tar lang bawk.

Edenthara hmeichhe naupang rual insual hi social media-a video darh leh sawi zuinaah chuan March 19, 2025-a thleng kha nia sawi a ni a, Thawhtanni vel khan a video hi a darh ta chiam a ni.

Aizawl District Child Welfare Committee (CWC) chuan Nilaini khan thuchhuah siamin video thehdarhtute hi paih (delete) vek turin an ngen tawh bawk.