Kan chak lakna ber Silchar lamah eng emaw a thlen a lirthei tlan theih loh a niha thil to ve nghal ngawt thin chu kan ram chhunga mi ngei, kan ni tin mamawh thlai leh a dang, chawhmeh kan tih hi a ni. Chutiang bawkin khawchhak lam atanga rawn kal thin thil thenkhat hi a to ve nghal ngawt zel bawk.

Covid-19 hripui avangin kumin chhovah a khat tawkin inkhuahkhirhna kan nei chho zauh zauh reng a, tun hnaiah phei chuan Lockdown 4.0 bik chu Aizawl Municipal area chhunga neih a ni a, district hrang hrangah Covid-19 No Tolorence forghtnight hman a ni bawk a, khauh takin hmun hrang hrangah inkhuahkhirna kalpui a ni. Hemi piah lamah Lailapur lam atangin Mizoram lut tur bungrua, ni tin mamawh phur lirtheite dan a ni a, mipui chu a tuartu kan ni a, chutih laiin sumdawng thenkhat ten hlawk taka sum siam nan hman an lo tum thung niing a ngaih theih.

Sawrkar lam chuan state thenawm leh ram pawn atangin bungraw lak luh dan tur kawng chi hrang hrangin a dap nghal hial a, hetih lai hian kan tual chhunga kan thil neihte chu a hma lam aiin a let aia tam fe ten a sang nghal a, thil tam tak kan lakna kum hlun Myanmar atanga kan lak luh ni tin mamawh thenkhatte pawh a to ve nghal bawk.

Commerce & Industry chuan chawhmeh leh thil man sang chawpchilh nghal thin chu dik lo an tih thu thuchhuah an siam hial a, hemi atan hian chak taka hmalakna pawh kalpui an tum. Sawrkar lamin mipui dinhmun hriaa hetianga hmachhawp a nei hi nakin zel atan pawh thil tul tak niin a lang.

Mizoram sawrkar chuan heng chawhmeh leh ni tin mamawh phur thlengtu leh sem kualtu te hi phalna zau tak a pe a, curfew chung pawhin chhun zan zawma an tei kual a phalsak. Hetihlai hian thil zuar pakhat chuan, a thil zawrh to chhan chu thiam inti takin, “Kan lakna a to, motor hman man a to,” a ti a. Hei hi thil zuar tam takin an thil tihto chhan an chhuanlam a ni. ZALEN-in motor nei pakhat hetiang bungraw phurtu pakhat a zawh ve thung chuan, “Tlanna a awm mumal loh avangin tlanna kan neih dawn chuan tiin kan rate aia tlawm pawhin kan tlan mai thin,” tiin a sawi a, ni danga an rate aiin an tlan tlawm thin thu a sawi ve thung.

Lockdown tirh chho khan sawrkar chuan Horticulture, Commerce & Industry leh a hnuaia corporation lian bera chhal ngam Mizofed chu suihkhawmin Vegetables Supply Chain a kalpui a, kha thil a kalpui hma khan a bikin Aizawl-ah chawhmeh a to hman hle. Mahse, he thil kalpui anih chinah kha chuan thlai man pawh a tlakhniam phah a, mipui mimir a chhawk zangkhai hle. Khaw tam takin Aizawl mai ni lo, district khawpui hrang hrangah leh quarantine centre a awm te tan a thlawnin chawhmeh an chhungkhawm reng bawk a, kan thlai thar leh kan tualto chawhmeh lamah hi chuan Mizoram hi kan intodelh thawkhat tih pawh a tarlang chiang hle niin a ngaih theih a ni.

Silchar lam atangin bungrua a luh loh a, Myanmar lam atanga bungraw rawn thleng thenkhat a to nghal zel ringawt mai pawh hi a mi chengte vang bawk a tih loh theih loh chen a awm a, chhuanlamah chuan transportation a ni ve leh bawk a, Tiau atanga bungraw lak buaithlakna chu an harsatna niin Champhai lam atanga ZALEN thudawnna chuan a sawi a, Hripui len hma kha chuan Check Gate tam lutuk chu sumdawngte buainaah an ngai a. Champhai thleng tawh bungrua hrang hrang pawhin Aizawl thlen nan sum chawina tur Check Gate paltlang tur an ngah chu an chhuanlam a ni. "Sum chawi hi ngai talo se tun ai hian bungrua pawh man man zawka a lei theih a rinawm," tiin ZALEN thudawnna chuan a sawi a, Lockdown hnuah phei chuan Gate khar nimahse Mizoram lamin kan mamawhna a san em avangin harsa takin Mizoram lam rawn kaipui a ni a. Chuvang chu a nia Lockdown lai pawhin cigarette tam tak man a nih. "Mahse, Aizawl-ah khawchhak cigarette chu in zu reng tho alawm, awm lo mai tur ni awm tak. A tlang reng tho. Pawisa an chawi a, recover an tum lo thei lo a, a to lo thei lo alawm," a ti. Nitin mamawh, Alu, Artui, Purunsen chu Aizawl nen a danglam vak loh thu a sawi bawk…