DOWNLOAD OUR APP

Read latest news on your phone
app-store
Buarpui Water Supply Scheme kuminah zawh tum?
Oct 27, 2019

Aizawl : Lunglei West Assembly Constituency bialtu MLA leh Agriculture, Cooperation leh Irrigation and Water Resources Department changtu minister ni bawk, C.Lalrinsanga chuan a bial chhung khaw eng emaw zat a tlawh hnuin nimin khan Buarpui khua atana tui lakna thar ruahman mek ‘Buarpui Water Supply Scheme’ hmunhma a hmunah kalin a enfiah a, kuminah zawh hman a nih theihna turin hmalak tum thu a sawi.

Buarpui Water Supply Scheme hna kal mek a tlawhnaah hian Er. Zodingpuia, PHE SDO hovin Department thawktuten an lo dawngsawng. He scheme hi cheng nuai 400 senga ruahman niin a tum ber chu ni zung chakna hmang tangkaia tui pump chhuah a ni a, Buarpui khaw in tinah tui hnianghnar taka semchhuah tum a ni. Buarpui khuaa Lungphun lui tui pump chhuah tum na atan hian solar panel 120 (40 kw) bun fel tawh a ni a, ni tin tui 80.38 cubic metre pump chhuak thei tura ruahmanna siam a ni. Buarpui water supply scheme hi kumin chhung ngeia zawhfel a nih theih nan minister hian department hnathawktute ruahmanna a siampuia a theih anga hmalak a inhuam thu a sawi.

Agriculture Minister a nihna angin ‘Organic Farming’ Mizoramah uar taka kalpui tum a nih thu a sawi. Kuthnathawktute tana sawrkar laipui scheme pawimawh tak kuthnathawktute pension scheme - Pradhan Mantri Kisan Mandhan Yojana (PM-KMY) leh thlai insurance scheme - Pradhan Mantri Fasal Bima Yojana(PMFBY) te pawh Mizoramah kalpui mek niin heng kuthnathawktute tana hamthatna te hi DAO Office-ah ngaihven leh hmang tangkai turin khaw tinah mipuite a chah a. UNDP hnuaia Global Environment Facility leh sawrkar laipui hnuaia Rainfed Area Development te pawh kalpui zel tum anih thu a tarlang bawk.

Minister hi Lunglei Additional DC Pu David Liansanglura Pachuau, Lunglei DAO Tlangtimawia Zote, DIPRO C. Lalremruati, ARCS Lunglei H. Lalnuntluanga, I&WR SDO Lalbiakdika leh official dangte bakah sawrkar flagship program Socio Economic Development Policy (SEDP) hnuaia Agriculture Development Board member pathum - Lalropuia Pachuau, Lalsangliana Hnamte leh Lalruatfela Colney te bakah khawtlang hruaitute leh party hruaituten an tawiawm a, nimin chawhnu khan Lunglei lam panin an haw leh.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh