ZALEN February 6, 2025 : Higher & Technical Education Department Commissioner leh Secretary H. Lalengmawia chuan, Mizoram State University dinna tur bill buaipui mek a ni a, tun Budget session-ah hian sawiho tura pharh hman tum a nih thu a sawi.

H. Lalengmawia chuan, NEP 2020 chuan kum 2035 hnu lamah chuan Affiliated College awm phal a nih dawn tawh loh avangin, tuna Mizoram University hnuaia college te an awm ang hian an awm thei tawh dawn lo tih a sawi a. “State sawrkar chuan sum harsa chung chung pawhin state university din turin ruahmanna a siam mek a, a bill pawh beih a ni tawh a ni,” a ti. State university hi a hautak lo thei ang berin, Clustered University-a din tum a nih thu a sawi a. College leh institution hrang hrang te chu hman tangkai tum a nih thu a sawi bawk.

Mizo Department, Pachhunga University College-in vawiina ‘Thangliana Kutchhuak leh Sulhnu Zir Chianna’ (National Seminar on Thomas Herbert Lewin’s Legacy and Contributions to Mizo Literature) tih an buatsaih-ah khuallian niin H. Lalengmawia hian he thu hi a sawi a. Kum 2019-a Prime Minister-in a thua a hawn tawh, Mizoram Engineering College pawh central-in a rawn nawr nasat tawh avangin, kum 2026 session-ah chuan, subject pali velah a taka class tan hman nei tum a nih thu a sawi bawk.

PUC Golden Jubilee Hall-a national seminar buatsaihah hian Khuallian H. Lalengmawia chuan, Thangliana chanchin leh a hnathawh chu zir chian tham leh zir chian tlak a nih thu a sawi a. Mizo hnam kha a hmangaih tak tak nge ‘diplomacy’ a thiam vang tih te leh Mizo nula 'Dari’ nupuia a neih pawh Mizo a hmangaih vang nge Mizo society-a tlaktlum a duh vang tih te pawh zirchian tham a nih thu a sawi tel bawk.

Thangliana (Thomas Herbert Lewin) hi Mizo hawrawpa thuziak hmasa ber, ziaka Mizo chanchin dah hmasa leh english-a Mizo thawnthu lo dah hmasa ber nia a hriat a ni a. Vailen vawikhatna (The Lushai Expedition 1871-1872)-a Zoluti (Mary Winchester) lalettu, Mizo te thian tha, kum 1872-a Mizo lal 7 leh an thuihhruai mi 27 te Kolkatta-a zinpuitu a ni bawk. Mizo nula ‘Dari’ nupuiah a nei a, Mizoram tihmasawn turin ruahmanna tam tak lo siamtu a ni bawk. A chanchin hi lehkhabu engemaw zatah ziah leh tar lan a ni tawh a, ama pual seminar erawh a vawikhatna nia hriat a ni.