Aizawl: Mizoram-a buh chin tamna ber Kolasib District-a loneitute chuan kumin chhung hian buh chi an mamawh zat an dawng thei dawn lo.

Agriculture Department hotute hnen atanga thudawn danin Kolasib District-ah kumin chhung hian tlangram-a buh chin tum mi 709 leh leilet-a buh chin tum mi 166 chu Agriculture Department-ah an in report a, tlangram buh chin tumna hmun hi 1216.5 tin niin, leilet-a buh chin tumna hmun hi 527.730 a ni. Agriculture Department-ah hian tlangram buh chin tum khaw 18 in report in, leilet-a buh chin tum khaw 12 an in report bawk.

Kolasib District chhungah tlangram buh chin tum in repot ten buh chi an mamawh zat nia mithiam ten an lo chhut sak chu 1216.5 kgs. a ni a, hetih lai hian buh chi 998 kgs chauh pek theih an ni thung ang. Leilet-a buh chin tum ten buh chi an mamawh zat nia mithiam ten an lo chhut sak chu 8562.3 kgs. anih laiin, 4690 kgs. chauh semchhuah theih a ni thung.

Thudawnna in a tarlan danin tlangram-a chin tur buh chi te hi Ratu, Lamchhip, Zohmun leh N. Hlimen atanga lakte an ni a, leilet-a buh chin tur chi te hi Guwahati, Assam atangin RKVY sum hmangin lei a ni thung. Agriculture Department in an chhinchhiah hnuhnun ber danin Kolasib District chu Mizoram District zinga buh chinna hmun nei hnem ber niin, 4342 hac.-ah chin a ni a, Champhai leh Lawngtlai District ten an dawt a ni.

Hetih rual hian Department in buh chi a semchhuah te hi a dawngtu ten ching tak tak lovin hralh sumah leh ei atana hmang an awm niin thudawnna rinawm tak chuan a sawi bawk.