Aizawl; Mizoramin a tlem berah kum khat chhungin buh Matric Tonnes (MT) 1,80,000 vel a mamawh a, hetih lai hian kum liam ta 2019-2020 a Mizoram buh thar zat chu MT 60,239 a ni. Mizoram district hrang hrang zingah Champhai district chu buhfai thar tam ber an ni.

Agriculture Department chhinchhiah danin, kum liam ta 2019-20 chhunga Mizoram buh thar zawng zawng MT 60,239 atanga MT 22,904 chu tlangram lo neih (jhum) atanga thar chhuah a ni a, a dang MT 36,357 chu leilet WRC (kharif) atanga thar niin, WRC (rabi) atangin MT 978 thar a ni bawk. Mizoram district 8 zingah Champhai district chu buh thar tam ber an nih laiin, Siaha district chu buh thar tlem ber an ni.

Kum liam ta 2019-20 chhung khan buh chinna atan hectare 35,210 a zau hman niin, chungte chu Jhum (kharif) atan hectare 18,510-ah buh chin a ni a, WRC (kharif)-ah hectare 16,232 leh WRC (rabi) atan hactre 468-a zauah buh chin a ni.

Kum hmasa lam 2018-19 a Mizoram buh thar chhuah zat chu MT 60,010 niin, hemi kum aia nikum a buh thar tamna hi MT 229 a tling. Buh thar tam ber Champhai district-in 2018-19 aia 2019-20 a buh an thar tamna pawh MT 415 a ni.

Kum khat chhunga Mizoram buh thar zat hi buh mamawh zaa 34 vel chauh a tling phak a, hei vang hian zaa 65 vel chu state pawn atanga lak luh a la ngai. Remote Sensing & Geographical Information System (GIS) hmanga mi thiamte chhut danin Mizoramah leilet siam theih ram zawl hectare 77,466 (0.25%) a awm a, chung zinga hectare 17,000 bawr vel chauh hman tangkai a la ni. Hei hi za a 32 chauh niin, a dang za a 68 chu leileta siam loh ram zawl a ni.