Aizawl July 20, 2023 : Nimina neih tan Parliament Monsoon Session inbuatsaihna All Party Leaders meeting Parliament Library building Committee Room-a neihah Mizoram MP pahnih C.Lalrosanga leh K.Vanlalvena te an tel a. C. Lalrosanga chuan Manipur buaina chungchang chu parliament session laiin sawihona hun siam ngei tul a tih a sawi.

Session chhunga sawiho tur Bill chhawp chhuah tur 31 thlirlawkna neih naah hian MNF party aiawha thusawitu C.Lalrosanga chuan Manipur buaina chungchang chu parliament session laiin sawihona hun siam ngei tul a tih thu te, mipui tamtakte nunna leh bungruate a luan ral tawh avangin a rang thei ang bera buaina tih tawp a tul thu te, thenawma awm an nih avangin raltlan tamtak Mizoramah an rawn luh thu te, sawrkar, kohhran, NGO te leh mimalin theih tawpin puih an nih  thin thu te leh sawrkar laipuiin chhawmdawlna Mizoram sawrkar kuta a pek ngei a tul thute a sawi chhuak a ni. 

Mizoram Lok Sabha MP hian Prime Minister-in Uniform Civil Code chungchang a sawichhuah thar avangin Parliament session-ah Bill anga a lut lo anih pawhin sawihona hun siam ngei ni se, an duh loh chhante chiang taka sawi fiahna hun siam law law tha a tih thute a sawi chhuak bawk.

Parliament session-ah hian Bill chi hrang hrang 31 sawiho tura chhawp chhuah a ni a. Chung zingah chuan Christiante leh Tribal hnamten ngaimawh em em Uniform Civil Code Bill erawh chhawp chhuah zingah a tel rih lo a ni.