ZALEN March 16, 2025 : Chief Minister Lalduhoma’n Aizawl-ah cable car/ropeway siam turin hmalakna a awm tih sawiin, chumi tur chuan Assam Rifles ram chhuahsan hman tangkai tum a nih thu a sawi.

Assembly budget session neih mek, March 13, 2025-ah he thu hi sawiin, chief minister chuan remtih tlan a nih chuan Assam Rifles quarter guard chung tlang chu a hmunpui ber (station)-ah hman ni se an ti niin a sawi a. Heta tang hian Pachhunga University College (PUC) nena inpawhin MINECO lama kal leh Ebenezer damdawi in lama a kal bakah, Chawnpuia All India Radio ram an dil pawh an phal tawh thu a sawi.

State University dah an tumna hmun leh Aizawl West College dahna hmun tur, Ch. Chhunga High School hmunah station awm lehin, chuta tang chuan Mizoram University-ah chhuk ta se tih an ngaihtuah niin a sawi a. Chu mi chin chu ropeway bul tanna atan chuan ni phawt se tih an ngaihtuah niin a sawi.