ZALEN, June 02, 2025: Chakma Autonomous District Council (CADC) politics boruak inlumletah BJP council member pariat, CEM nilai Lakkhan Chakma hote chuan state-a sorkar lai party ZPM an zawm.

Lakkhan Chakma, Amit Rayan Chakma, Sanjib Chakma, Kalasoga Chakma, Supan Chakma, Ajoy Kumar Chakma, Mohan Chakma, leh Santosh Chakma te chuan BJP atanga an banna thehlutin nimin khan ZPM an zawm.

Politics boruak inthlak danglam reng mai chuhriatthiam harsa tiin Central Mizoram Chakma Students’ Union chuan an politician te chetdan chu hriatthiam harsa tiin demna thuchhuah khawng tak an siam.

"Hetiang politics boruak inthlak thleng reng mai hi a khamawm hle a, district council huam chhunga hmasawnna a thuanawp phah a, council zahawmna pawh a tihniam a ni," tiin Central Mizoram Chakma Students’ Union chuan thuchhuah an siam. 

Politics inlumlet avang hian ZPM chuan member 24 awmna council (ruat seat 4 nen)-ah member 12 an nei ta a, BJP hian paruk an la nei a, MNF in seat khat an nei ve bawk.