Aizawl January 12, 2023: Chin Association of Maryland, Inc (CAM) chuan January 10, 2023 tlai lam dar 5:15 vela Myanmar military fighter jets ten Chin National Front/Chin National Army Headquarter, Camp Victoria an beih naah India ram chhungah pawh bomb thlak a ni, tiin Myanmar sipai te chet dan hi ngawihbopui mai lo turin khawvela democracy ram lian ber India sawrkar an ngen.

CAM chuan Chin State, Myanmar-a Camp Victoria beih a nih tum hian India ram chhung pawh bomb thlak a ni an ti a, Myanmar Sipai ten bomb an thlakna hi YouTube-ah video hmuh tur a awm tiin, he inbeihnaah hian CNA mi pangnga an thi niin an sawi a, Fighter pangnga ten CNA hmun hi an bei tiin heng zinga pathum hi Yak-130 niin pahnih hi MIG 29 niin an sawi bawk.

CAM chuan an thudawnna in a sawi danin India leilungah bomb pakhat chu a tla ngei a, Chin state, Myanmar ramria Farkawn, Mizoram-a cheng te truck chu bomb thlak hian a tichhia an ti a, he truck dinna atanga meter 50 velah a tla niin an sawi a, truck hmalam darthlalang pawh hi a keh vek an ti a, a driver erawh a him hram niin an sawi. 

CAM chuan jets fighter hmanga Camp Victoria beihna hi an dem tih thuchhuah an siamah an tarlang a, thi chhungte an tawrhpui thu an tarlang bawk.

CAM chuan sipai ten Camp Victoria a beihna hian sipai rorelna paihthlak a nih theih nana beitu CNA, Chinland Defense Forces mai bakah Burma ram chhunga Chin mi te rilru a tihpaukhauh sawt an rin thu an sawi bawk.

CAM chuan khawvela democracy ram lian ber India pawhin India leilunga Myanmar sipai ten bomb an thlak hi ngawihbopui mai mai chi nia an ngaih loh thu an tarlang bawk.