Aizawl: Tunlai social media lama lar tak ‘cancer damdawi atan bachhim a tha’ nia sawi chu mithiam ten an fak lem lo.

Zalen palai zawhna chhangin Cancer Doctor pakhat chuan, “Bachhim ei vanga miin ka dam an tih chuan an damlo tih ngawt theih a ni lo a. Mahse, keini chuan treatment la mekten thlah thaka an ti thin erawh kan recommend lo hle a ni,” a ti. Cancer Doctor chuan cancer damdawi leh enkawlna chi hrang hrang a awm tih sawiin tinreng damdawi anga Bachhim sawi chu a fuh lo tih a sawi a. Cancer pawh chi hrang hrang a awm ang deuhin a enkawlna pawh a inang lo tih a sawi bawk.

Ayush thawktute pawhin Bachhim thatna chu laboratory-ah finfiah a nih loh avangin a thatna an hriat loh thu Zalen an hrilh a. Thlai hnim damdawi chin tur an tih zingah pawh a tel lo tih sawiin cancer damna tak tak ni se chuan hnam dangin an hriat an rin thu an sawi bawk.

Health Department hnuaia Food & Drug lam thawktute pawhin zirchianna a awm loh chuan a that leh that loh sawi mai har an tih thu an sawi a. A hmangtuin tha tlata an inhriat chuan anmahni thu a ni mai, tiin Zalen an hrilh bawk.

Hetih lai hian mi tam tak chuan Bachhim hi an thatpui niin an sawi a. Bachhim ei vanga an na ziaawm ta pawh sawi tur an awm niin Zalen chuan thu a dawng. Cancer damdawi atan Bachhim a tha nia an sawi avangin mi thenkhat sumdawnna atana hmang an awm a, thenkhat erawh chuan a thlawna an pek theih thu an sawi thung.