Aizawl: Health & Family Welfare department chuan cancer hemna khawl thar vaibelchhe 11 man lei a tum.

Health Secretary H.Lalengmawia IAS sawi danin tuna Mizoram State Cancer Institute, Zema-bawk-a cancer hemna khawl chu a hlui tawh avangin inhem thei lo mi engemaw zat an awm thin a, hei vang hian khawl thar vaibelchhe 11 chuang hu lei an tum tih a sawi a, Finance department pawhin pawisa hi an pe tawh niin a sawi bawk.

Health Secretary chuan hmarchhak biala a tha leh changtlung ber ni turin Zemabawkah hian cancer damdawiin ‘super speciality hospital’ din tumin hma an la mek tih a sawi bawk a. Damdawi in dinna tur hian vaibelchhe 500 vel a ngai dawn nia sawiin Japan sawrkar JICA sum hmanga din tum a ni tiin a senso 20% chu state tum ve turin an ti tih a sawi a, sum hi a pung tlem chi tur a niin kum 30 chhunga rulh tur niin a sawi bawk.

Sawrkarin Health department-a thawktu indaih loh sutkian nan hnaruak 734 hnawhkhat turin hma a la mek tih Health Secretary chuan a sawi bawk a. Hnaruakte hi thla 2/3 hnuah chuan tihfel an beisei nia sawiin hei hian Health department-a indaihlohna zualpui chu a phuhruk an beisei tih a sawi a. Hei bakah hian Zoram Medical College a hna hrang hrang 219 hnawhkhah tumin sawrkarin hma a la mek niin a sawi bawk.