Aizawl: Mizorama Covid 19 damlote enkawlna hmunpui Zoram Medical College-a damlote chaw man chu Rs. 300-ah tisang turin ngen a ni a; mahse, sawrkar chuan an dilna hi a la ti hlawhtling lo nia thudawn a ni.

Zalen thudawn danin ZMC-a damlote hian chaw leh ei tur tha an mamawh avangin sawrkarin ni khata chaw man atana a bithliah Rs. 80 chu a tlem em avangin Covid Care Centre (CCC) leh quarantine centre-a chaw pekna man ni khatah Rs. 300 ang tal ni turin sawrkar an ngen a; mahse, sawrkar chuan an ngenna hi a ti hlawhtling hrih lo a ni.

Zalen-in a biaknaah Health Secretary H.Lalengmawia chuan October 2020 atanga hman tan turin damdawi in hrang hranga chaw ei man zat, ni khata Rs. 80 ni thin chu Rs. 120 ah tihsan a ni tih a sawi a. Tuna rate thar chu finance department-in an pawmpui (approve rate) a ni tiin a sawi a ni. Rate thar ni khata Rs. 120 chu a tha tawk e tihna lam ni lovin tun dinhmuna sawrkarin awm tawka a ngaih a nih vanga bithliah a ni tih a sawi bawk.

CCC-a chaw ei tur pe thin chuan ni khatah damlo 1 tan Rs 300-a an la pek thin thu ZALEN a hrilh bawk.