ZALEN September 13, 2023 : Young Mizo Association (YMA) rorelna sang ber dawttu, Central Co-Ordinnation Committee (CCC) chuan vawiin khan rorêl (meeting) vawi 97-na chu Central YMA Hall, Tuikhuahtlangah neih a ni a, Central YMA President R. Lalngheta'n he meeting hi a kaihruai a ni.

Meeting-ah hian CCC meeting neih hnuhnung ber Ni 12.4.2023 leh tun inkara Central YMA chetvelna leh hmalakna hrang hrangte, rorêl thu bawhzui kawnga hmalaknate Prof. Lalnuntluanga, General Secretary in report a pe a.

October 24-26, 2023-a Biatea neih tur YMA Inkhawmpui Lian-a Rorêl palaiten an rel tur, Agenda thlit fim a ni a, Inkhawmpuia chhawpchhuah turin YMA khawih 6 leh YMA khawih 2 leh Chhiatni thatni kaihhruaina ennawn te an dah a. Hemi bakah hian 2023-2023 Budget te pharh a ni bawk.

CCC ah hian member-te chu Central YMA Office Bearers-te, Central YMA CEC member-te, Sub Hqrs. aiawh mi 6, Group YMA aiawh mi 2 leh khawpui chhung Branch YMA aiawh mi 1 theuhte an ni.