Aizawl July 15, 2023 : Ministry of Health & Family Welfare, New Delhi leh Uttarakhand sawrkar țangkawpin an buatsaih ”15th Conference of Central Council of Health and Family Welfare (CCHFW),” “Swasthya Chintan Shivir” chu nimin khan Hyatt Regency, Dehradun, Uttarakhand-ah tan a ni a. Health Minister Dr R. Lalthangliana chuan Mizoram chu nausen thih tlemna a nih thu leh ZMC dinhmun te sawi.

CCHFW hawnna hunah hian Dr R. Lalthangliana chuan Mizoram-in hriselna tihhmasawnna kawnga hma a lak dan te tarlangin NITI Aayog in tehfung chi hrang hrang hmanga a tehnaah kum 2017-2018 atang khan Mizoram chu India rama state tenau zingah chu hriselna tihhmasawn kawnga hma la tha ber pakhatna dinhmun a hauh ta ziah tih tarlangin, Mizoram chu nau piang kum 1 hnuaia lam (1000 zela chhutin) thi tlem berna state (3 infant deaths per 1000 live births) an nih mek thu a tarlang bawk.

Mizoramin Medical College kan neih chhun undergraduate course (MBBS) kalpuina Zoram Medical College (ZMC) in batch tin ah zirlai 100 an la thin a. MBBS batch hmasa ber kum 2018-19 a lut te chu kumin April thla khan an graduate a, ZMC ah internship an ti zui nghal a ni tih sawiin Minister chuan ZMC chu medical college thar ;a naupang tak a nih avangin thanlen zelna leh hmasawn zelna turah mamawh kan la ngah em em a ni tiin, sawrkar laipuia hotuten an tanpui an mamawh thu a thlen nghal a ni.

Ni 2 awh inrawnkhawmna sang, Union Health & Family Welfare Minister, Ministry of Health & Family Welfare a mi pawimawh te bakah state tina Health Minister te, Health Secretary te, leh Mission Director, National Health Mission te telna hi vawiin tlai khan khar a ni.