ZALEN July 5, 2025 : CDF Hualngoram leh CNDF te inkahna kal zelah Zokhawthar lamah silaimu tam tak a len luh avangin Zokhawthar YMA chuan an khaw mipui nun ti ralkhel thei zawnga silai hmetpuak tawh lo turin pawl pahnih te Information Aurinna hmangin an hrilh a, inkahna erawh he thu buatsaih lai thleng hian a la tawp lo.

Zokhawthar YMA te chuan raltlan an la rawn lut reng an ni a, aurinna hmanga an hriattirna, an ngenna ngaipawimawh lova a chet zui zel chuan Zokhawthar-a Raltlan zawng zawng Khawmawia an dah phei tur thu an hriattir tih thuthanga awm chu a dik lo an ti. Raltlan te hi chhungte nei an nih chuan an chhungte bel tura hriattir an ni a, a dang hi relief camp-ah leh YMA Hall ah te an awmtir a ni.

Zokhawthar YMA hruaitu atanga ZALEN thu dawn danin an inkah chhan chiah hi an hre mai lo tih an sawi a, chhan tam tak a awm thei a, Tun tum an inkah chhan hi Tiau gate duty an duh ve ve vang nia sawi a awm a, chu tih rualin ram inchuh reng an ni a, an politics hi hriat a har thu sawiin chhan chiang fak anni lam chuan an hre thei rih lo a ti.

He chanchin buatsaih lai hian Khawmawi leh Haimual inkar ruamah an la inkap reng a, helaia Duty post pakhat chu an inchuh niin sawi a ni a, CNDF lam hian an la tawh niin an sawi tih Zokhawthar atanga ZALEN thudawnna chuan a sawi a, mahse, inkah a awm chhung hi chuan thu chiang sawi theih a ni lo, a ti. Tun dinhmunah Myanmar lama luh chu thil tih chi loh tawp a nih thu a sawi bawk.

Inrinni tuka Myanmar ram chhunga CDF Hualngoram leh CNDF inkahna avanga Mizorama sahimna zawnga tlanchhia pakhat Tiau lui-a chesual chu raltlan thar ni lovin raltlan sa, Khawmawi lama hnathawk tura kal, an inkah avanga rawn let zawk a nih thu thudawnna chuan a sawi.