Aizawl November 5, 2022 : Ni zan (4.11.2022) a Central YMA Executive Committee thukhawm chuan Central Anti Drugs Squad (CADS) Batch hnihna puipa tur an ruat thar.

CEC ruahman dan chuan CADS ah hian Convener ah Pu Fabian Lalfakawma, Treasurer CYMA a ni ang a. Asst. Convener ah Pu RL Zomawia, CEC Secretary ah Pu Chawngthankima, CEC leh Asst. Secretary ah Tv L. Ramdinliana Renthlei, CEC te an ruat a. Aizawl khawpui chhunga  Branch te atangin member tur mi 48 ruat an ni a. November - December, 2022 chhung an thawk ang. Batch 2-na lawmluhna hi hun remchang hmasa ah hman a ni ang.

Central YMA Executive Committee (CEC) thukhawm chuan a hnuaia mite hi an rel bawk.
    1.Land Owners Association ( Vairengte- Kawnpui Package 3-6) ten zangnadawmna an hmuh tum an hmuh mai loh avanga Mizoram chak lakluhna kawngpui ber an dan avanga harsatna awm thei te thlir chung in a kawngpui danna hmun boruak thlithlai tur leh Association hruaitute kawm turin lam kal tirh rem tih a ni.

    2. Kram Infracon (P) Ltd.ten Thentlanga hmun a kawng an laih meka an harsatna tawh te a hmuna enfiah tur intirh rem tih a ni. 

    3.Rorel Inkhawm tum 3-na Oct 27, 2022 a Thingsulthliah Khelmuala hman zawh tak thlirletna hun hman a ni. Rorel Palai kan kal tha a lawmawm kan ti hle, thlengtu lam inbuatsaihna pawh a tha e kan ti.

    4.Ni 9.11.2022 a YMA thuneitu sang Central coordination Committee (CCC) thutkhawm, Central YMA Hall a neih tur thlir lawk a ni.    

    5. Ni 10.11.2022(Ningani) ah PWD- YMA thawhhona chungchang sawihona hun Bawngkawn South YMA Hall ah hman tha tih a ni a, he hunah hian CYMA hruaitute, Sub-headquarters YMA hruaitute, Group YMA hruaitute leh Aizawl khawpui chhung Branch aiawhte an tel ang. 

    6. Ni 8.11.2022( Thawhlehni) ah PHE Department te nena thawhhona kal zelah Aizawl khawpui luhna kawngpui dung thenfai hnatlang koh a ni a, khawpui chhung Branch atangin aiawh mi  6 aia tlem lo thawk chhuak tur a beisei a ni.

    7. Ni 11.11.2022 ( Zirtawpni) zanah HIV/AIDS darh zel tur venna "Zoram Harh Rawh", Campaign hawnna hun CYMA Hall ah hman tum a ni.

    8. Zoram Harh Rawh Campaign hnuaia Aizawl District huamchhunga Branch YMA te Hnam lam leh Zai intihsiakna huaihawttu tur Organising committee din a ni.
    
Heng bakah  pawl inrelbawlna thil pawimawhte sawiho a ni bawk.