Aizawl : December thla-a chhung tinten elctric bill an dawnah mi tam takah chhungkaw tam tak tan electric bill chawi a ngai lo a, chhungkaw tin tan thla dang zawng aiin kawlphetha kan chhit man chawi a hniam vek, chawi ngai lo an awm bawk a, eng emaw chen advance-in an peksak bawk. Hei hi Covid-19 hripui avanga central atanga, Ministry of Power lamin rebate a siam vang a ni.

Power & Electricity Department, Mizoram atanga ZALEN thudawn danin central sorkar hian hripui avanga mipui ten chhawmdawlna atana hma a lakna hrang hrangah elctric bill hi state tinte chu tihniam turin a ti a, hemi denchhen hian Mizoramah pawh hei hi kalpui a ni a, heng rebate hi state emaw, central lam emawin sum leh paiah hlawkna a hmuh a thiang lo a, Mizoram sorkar chuan electric bill lamah mipuite hamthatna tur hi a siamsak a ni.

Sawrkarin sum leh paia chhiah a tihtlem hi mipuiin chhawr tur a nih angin Mizoram P&E Deptt. chuan consumer te contracted load atanga chhutin an bill hi a siamsak a, Kilo Watt khat-ah Rs. 201.65 zelin bill a tih tlawm sak. H. Lallianmawia, Sub-Divisional Officer, Distribution Sub-Division-I, Power & Electricity Department chuan, “Electric load neih dan azirin bill pek tur hi chhut a ni a, hemi mil hian bill hi chhut a ni a, chhungkaw tam tak tan bill pek tur an neih lo thla a ni dawn a, chu mai bakah thenkhat tan phei chuan thla thar lamah pawh bill hi eng emaw chen advance a pe lawk ang an ni,” a ti.

Electric bill hi fix charge leh rental charge behchhana bill siam a nih thu P&E lam chuan ZALEN an hrilh a, fix hi chu an load neih dan azira thla tina an chawi tur nghet sa niin, rental hi chu an êng chhit dan azira tel leh a ni thung a, tuna elctric bill kalphung-ah hi chuan fix rate zulzuia bill hi siam a ni a, fix rate an chawiin an bill hi a khum dan azirin bill hi an pe a, thenkhat tan chuan bill pek hi an ngai lo a ni.