Aizawl: Mizorama jail lian ber, Central Jail-ah dam chhung tang tura thiam loh chantir mi 52 an awm mek a, hetihlai hian Covid-19 hripui leng vangin Central Jail-ah mi tang an tlem phah tawh lo a, jail lut thar turte hriselna dinhmun uluk taka enfiah thin a ni.

Central Jail thawktute hnen atanga ZALEN thudawn danin, Central Jail-ah hian chawhrualin ni tin jail lut thar mi 10 vel awm reng ang a ni mek a. Supreme Court thuchhuak angin, kumin April thla khan Mizoram chhunga jail tang mi 337-te chu Covid-19 darh palh thei thu-ah chhuah an lo ni tawh a, chung zinga mi 289-te chu vawi khat thil tihsual avanga tang niin bail-a chhuah an ni.

Hetihlai hian Central Jail bikah chuan Covid-19 vangin jail tang an tlem phah tawh lo a, lut thar pawh an tlem phah tawh lo nia thudawn niin, a hmaa venthawn thil vanga chhuahtirte hmun ruak chu luah khah leh vek tawh a ni. Mi tang 545 awm theihna Central Jail-ah he thu ziah lai thleng hian tang 587 an awm mek a, chu chu building luah theih china mi tang awm thei zat aia tam a ni. Jail tang mek zinga mi 52-te chu dam chhung tang tur an ni a, chung mite chu tualthah vanga thiam loh chang deuh vek an ni.

Central Jail thawktute sawi danin, mi tang lut thar turte chu Covid-19 hri leng vangin fimkhur thilah endik hmasak thin an ni a, rinhlelh awm deuhte chu endik turin Civil Hospital, Aizawl leh ZMC-ah kalpui thin an ni. Heng bakah hian Jail lut tharte chu khung hran hmasak zel an ni thin. Tun thlengin Central Jail chhungah Covid-19 hripui vei hmuh chhuah an la awm lo.

Central Jail-a tangte hi Covid-19 vangin fimkhur thilah tlawh/kan phal an ni lo a, mobile phone dah a ni a, tangte biakpawh nan hman theih a ni thung.