Aizawl February 19, 2024 : Vawiin Mizo Hnam Run chhung inkhawm neih a ni a, hun hnihnaa thusawitu MNF Treasurer K. Vanlalauva chuan revolutionary party an nih angin Central sawrkar hmalak dan a zirin an inralrin a tul niin a sawi.

MNF Treasurer chuan, "Central sawrkar hmalak dan azirin he revolutionary party hi a inralrin a tul ang. MNF hi revolutionary party kan ni a. Party chhung wing hrang-ah pawh national tih kan telh vek a ni. India in ama thua min rinlut dodal ngam party kan ni a. Political party pariatin an party nuaiboin min zawm tawh. Hnam movement kalpui anih laiin, ram leh hnam tan anih avangin kan phunnawi ngailo a. Amaherawhchu, kohhran hoten, inthiltih hi tha lo kan ti lo, in dosaka te hian kan tlin tawhlo e, an tih avangin inremna lam kan hawi ta a ni," a ti.

Auva chuan Calcutta convention ah India sawrkar nen inremna lam hawiin inbiak a ni. Pu Laldenga'n, "Kan hnam martarte thisen avangin Mizote hi khawvel hriatah kan awm dawn ta," a ti hial a ni. Remna leh muanna kawng kan zawhna hautakzia leh kawng thuizia kha thangtharten an ngaihtuah let a tul hle a ni, a ti.

MNF Treasurer chuan, "Hnam movement kalpui anih laia ta, remna hnuaiah pawh finance department ah kum 20 dawnlai ka lo awm ve tawh a. Tunah chuan midang ken ve ka tum tawh," tiin, MNF hi mipui court in thiamloh a chantir niin a sawi bawk.

K. Auva chuan, "Campaign laia mipui hmaa kan intiamna kha mipui ten hrereng se, mipui court in lo enteng ang u. MNF sawrkarin sikul thahnem tak a dahngheh kha an dinhmun ngaia dah let an nih chuan, mipuiin thiamloh an chantir ngei ang. Sawrkar thar hi a pawnga puia bei lovin, mipuiin lo en zel sela, mipui court-ah thiam an chan leh chanloh a lo lang mai dawn a ni. Party mipuite beidawng mai lo ila, kan diklohna theuhah mahni insiam thain, lungrual takin ke i pen zel ang u," tiin party mipui kalkhawmte a fuih bawk.