ZALEN February 17, 2025 : MNYF President Robert Romawia Royte, MLA chuan Central sawrkarin Mizoram min zuam ta lutuk hi a pawi a, hnam party a sawrkar leh a ngai. Central sawrkarin North East State-ah Mizoram min zuam ber a ti.

Mizo Hnam Run chhung inkhawm vawiina neihah Robert Romawia chuan: "MNF chu hnam party kan ni a, kan hotute rorelna leh ram rorelnaah pawh a lang fo mai. Free Movement Regime - Burma nena kan inkalpawhna chu kan chief minister thar chuan Delhi a zin tumin hei hi Central sawrkar thu a nih thu a zu thlen a. Assembly-ah ZPM MLA-in FMR dodalna a putluh chu zaah zain kan thlawp a nih kha. Amaherawhchu, ni 30.12.2024 khan Mizoram sawrkar chuan order tichhuakin Mizo mipuite tan mai ni lo northeast tribal mipuite tana thil tha lo tak FMR hlihna chu kalpui a ni ta a ni. MNF kha la sawrkar ila chuan hei hi kan tih loh tawp tur a ni ang," a ti.

Central sawrkarin Mizoram a zuam ta lutuk tih sawiin, "North East State-ah Mizoram min zuam ber. A pawi tak zet a ni. Hnam party kan sawrkar leh thuai loh chuan kan ram leh hnam tan a him dawn lo a ni," a ti a. Nagaland CM pawh Delhi-ah kalin FMR a dodal thu huai taka a puan ngam thu a sawi bawk.

Robert-a chuan State Day (Feb 20) lo chhuah dan tlangpui a sawi a. "Peace Accord sign dawn lai khan India danpui hnuaia kan himna turin Pu Laldenga-ten Mizoram State Legislature remtihna lak kher ngaia an bilh tel kha a ropui hle a. Remna ni a ropui em em rualin, remnain a ken tel pawh kan lawm tel a ngai - Article 371G hnuaiah kan hnam, kan sakhua a him tlat a ni," a ti.

Remna sign hnuah INC leh MNF Legislature Party khan Chief Minister turin Laldenga an ruat thlap a. Local politics-a inbeih thinna - lal thutthleng a kian tih nen a inang chiah lo, a ti bawk.

Tun local body inthlan result sawiin Pu RRR-a chuan, "Lungleiah LMC kan inthlan khan ZPM 100%, a hnu MLA 2023-ah 100% bawk. Tuna LMC chhunga local body inthlanah erawh 40% chauh an la ta a, 60% an hloh ta der mai. Hetiang hi ruling party-te vote hmuh thin dan a ni lo.

"Village Council pawh 47% chauh la a, 52% ah an tla hniam hi ruling party-in an hmuh thin ang an hmu phak lo nasa hle. Ruling party chuan local body ah 70%-80% vel an la thin tlangpui. Hei hian an dinhmun hniamzia a tilang chiang hle a ni.

"Hetih rual hian ZPM chhiat avangin MNF kan tha ta viau tihna erawh a ni lo. Kan insiamthat a, kan inenfiah a ngai. Pathian leh kan ram tan titu hnam party kan nih chuan kan thusawi leh a taka kan tih a inmil a ngai," a ti.