Aizawl : Moina Benarzi, Director, Ministry of Minority Affair leh MSR Naidu, Central Water and Power Research Station Scientist 'C' te chuan Zirtawpni khan Siaha District chhunga Jal Shakti Abhiyan (Catch the Rain) hnuaia hmalakna hrang hrangte a hmunah an enfiah. 

Central official te hi District Bawrhsap Lalsangliana leh JSA (Catch the Rain) concern Line Dept, Head of Office ten Circuit House-ah an lo dawngsawng a ni. Circuit House-ah hian Power Point Presentation hmangin Abraham Beirazi Khithie, PD, DRDO in JSA (Catch the Rain) project hnuaia Siaha District chhunga hmalak tawhna  leh hmachhawp mek te entirna hun a hmang a. JSA Concern Dept, hrang hranga Head of Office te pawhin Central Official te zawhna leh an thil hriatchian duh te hrilhfiahna hun an hmang bawk.

Circuit House-a inkawmhona hun hmanzawh hian Noaotlah-I, II &III(KM-10)-a, JSA (Catch the Rain) project hnuaia hmalakna hrang hrang te a hmunah an enfiah nghal a ni. Gramsabha te pawh an ko bawk a ni.

Jal Shakti Abhiyan (Tui Hnianghnar tura Beihpui thlakna) hi India Sawrkar Laipui in India ram chhunga Tui harsatna zualna District 256 a thlanchhuah te hnena Tui hnianghnar zawk kan neih theihna tura Beihpui a thlakna Project a ni a. September 19, 2019 atang khan Siaha District-ah hian kalpui tan a ni. Mizoram-ah chuan Lawngtlai leh Siaha district te hi JSA kalpuina tura District thlanchhuah te an ni.

Central Official ten an enfiah tak hi JSA hnuaia hmalakna hrang hrang zingah, Fur ruahtui luangral mai tur lo khawl/chelh dinna tura hmalakna (Catch the Rain) bik an lo enfiah a ni. JSA (Catch the Rain) Site inspection-ah hian Central Team te hi Abraham Beirazi Khithie leh Vabeimozachhi, BDO, Siaha RD Block te bakah concern dept, official ten an tawiawm a ni.