Aizawl : New Capital Branch YMA duty ten Ni 27.5.23 zing dar 1:00 vel a No.4 an mansak chu Central YMA CADS ten chhuizui in, an man pakhat phone-a No.4 sawilang si lo a, No.4 chungchang sawina ngei nia hriat message pakhat an hmuh atanga ringhlelin an dawp a, Zokhawthar atang motor pakhat atangin No.4 eng emaw zah an man phah.

Zokhawthar atanga No. 4 rawn phur hi chhui zui nghal niin Motor awmnahi  zing dar 3:00 vel atangin a theih angin an chhui zui a, power house phei a motor pakhat ding chu No.4 phurtu a ni tih an hriat hnuah, Excise & Narcotics Deptt. hnuaia Anti Narcotic Squad te be pawp nghal in motor chu Excise & Narcotics Deptt. office kawtah lakphei a nih hnuah dap a ni a. Zikhlum ip chhungah Hawng 3 leh artui bawmah Hawng 11 hmuh a ni.

Heng No.4 rawn thawntu hian Zokhawthar atang bawk in mattress Cheng 30,000 man vel a rawn thawn tih hriat a ni a. Mattress chu uluk taka en in, mattress sira a thuina pawr chhete awm chu ringhlel in, mattress chu hawn anih hnuah a chhungah No.4, Hawng 110 hmuh a ni. Heng No.4 man te hi a vaiin Hawng 126 (Kg.1.602) a ni.