Aizawl January 18, 2023: Central YMA hruaituten vawiin khan Bangladesh atanga Mizo hnahthlak unau, sahimna zawnga India ram rawn tlan lut te an chenna hmun, Parva leh Vathuampui-ah an tlawh a. Raltlante chu an tih theih chinah theihtawpa tanpui an inhuam thu an hrilh a, thlamuanga taka awm turin an chah.

Tuichawng Group YMA, Branch YMA hruaitute leh khawtlang hruaituten CYMA leh sub-headquarter hruaitute hi an an lo dawngsawng. Parva-a Vantlang inkhawmah Central YMA President R. Lalngheta chuan, Sahimna zawnga Mizoram lut te thlamuang taka awm turin a chah a, YMA, Sawrkar leh Mizo mipui ten an tih theih chinah theihtawpa tanpui an inhuam thu a sawi.

CYMA hruaitute hian Parva-ah hian BSF te an kawm a, raltlan dinhmunte leh an harsatna te an sawipui a. Manganga sahimna zawnga India pan te harsatna siam sak lo tur leh tanpui zawk turin an ngen.

Central YMA hian mipuite thawhkhawm atangin tanpuina, Mutbu, Silpouline, Emergency light, Camp-a hman tur Electric bungrua, Solar lght, Charger etc. bakah pawisa Cheng Nuai hnih an hlan - Parva - Rs. 45,000, Vathuampui - Rs. 30,000, Chamdur P - Rs. 40,000, Mautlang - Rs. 30,000, Hmawngbu - Rs. 30,000), Tuichawng Group YMA - Rs. 20,000.  Pastor Sawmkhupa ralna a fanu hnenah YMA hmingin Rs. 5000 an hlan bawk.

CYMA hruaitute hi nizan khan Chawngte ah riakin Chawngte Group YMA leh Branch hruaitute nen inkawmna an nei. Central Young Chakma Association (CYCA) hruaitute pawhin an lo kawm bawk a, CYMA President R. Lalngheta chuan CYCA hruaitute chu raltlante lo puihna kawngah theihtawpa tang ve zel tur leh an tana harsatna siam zawnga che lo turin a ngen.

Central YMA atang hian President R. Lalngheta leh Asst. Secretary Prof. Malsawmliana te bakah CEC member mi 8 an kal a, Sub-Hqrs YMA, Lunglei hruaitu ten an tawiawm bawk a ni.