ZALEN March 19, 2025; Tunhnaia Manipura Zofa unau Hmar leh Paite te inkarah inhriatthiamlohna lo thleng chungchangah vawiin ni 19.3.2025 (Nilaini) tlai khan Central YMA hruaitute leh Hmar Inpui hruaitute Central YMA Office ah inkawm a ni a. Hemi hnuah hian Central YMA hruaitute hian Siamsin Pawl Pi (SSPP) hruaitute kawm leh an ni bawk.

Manipur a Zofa unau kara inhriatthiamlohna lo thleng chungchangah Central YMA chuan pawi a ti tak zet a, inremna a awm thuai theihnan a hma la turin Churachandpur District a hnam pual hruaitute a ngen a ni. Hemi in a nghawng, Songtal District a mipui vei vak te tan himlo anga sawi a awm avangin Mizoram lama tangkhang awm te pawh tha taka kal tlang tir leh an nih avangin Central YMA chuan ZRA te chungah lawmthu a sawi a ni.

Central YMA hruaitute chuan Hmar Inpui leh SSPP hruaitute chu Churachandpur tualchhung buaina in Mizorama nghawng a neih lohna tura theihtawp chhuaha hma la turin a ngen a, Central YMA pawhin a theih ang angin hma a la a, remna leh muanna a awm theihnan hma a la zel dawn a ni. 

Central YMA hruaitute chuan Mizoramah tuman chi bing zawnga boruak siam lo tur leh tan la lo turin a ngen a. Mizo hnam inpumkhatna tura theihtawp chhuaha tan la turin mipuite a ngen bawk a ni.