Aizawl June 12, 2024 : Vawiin chawhnu khan Central YMA chuan kumin a MBSE hnuaia HSLC leh HSSLC Exam- a Top-10 a Mizo tling te lawmpuina leh fuihna hun an hmang.

He hun hi Prof. Lalnuntluanga, Vice President in a kaihruai a, Prof. Malsawmliana, General Secretary in Report leh inhmelhriattirna hun a hmang.

Lawmpuina an pek te hi HSLC Top- 10 a tling Mizo 13, HSSLC (Arts)- 14, HSSLC ( Sc)-9 leh HSSLC (Com)-11 an ni a, an vaiin 47 an ni. Lawmpui a thuziak leh Rs.3,000/- theuh an hlan.

Lalhmachhuana, President, Central YMA in thu sawiin zirlaite chu an zir leh zelna turah Mizo hnam hre reng tur leh hnam tana thahnemngai taka zir turin a chah. Zonun ze mawi leh hnam nunphung te kal san lova Mizo identity vawng nung zel turin a chah.

He hunah hian Dr Krista Roluahpuia,Assistant Professor, IIT Gandhinagar a’n zirlaite fuihna thu a sawi. Zirlaite chu taima taka lehkha zir tur leh Pathian hrereng turin a chah.

David R. Lalsawmtluanga, M/s Liando Auto Works & Ashoka Leyland Dealers hnen atangin fuihna thu ngaihthlak a ni bawk a, anni hian sum leh pai an thawh a ni.

Lawmpuina hunah hian Zirlaite bakah nu leh pa an tel bawk. MS Ralte, Finance Secretary in kalkhawmte hnenah lawmthu sawina a hmang.