Aizawl: Central YMA chuan Champhai Sub-headquarters YMA hnuaia Vanhnuailiana Group YMA huamchhunga Myanmar raltlan te hnenah tanpuina a hlan.

Tanpuina sem tur hi nimin khan Kulikawn, Ngaizel Road atangin Central YMA president R.Lalngheta'n a vailiam a. Tanpuina an pek hi buhfai quintal 100 leh silpouline bag 10, a vaia Rs. 3,66,000 man hu a ni a. Heng bungrua-te hi Champhai Sub-headquarters YMA leh Vanhnuailiana Group YMA hruaitute'n sem darh hna hi an lo thawk dawn a ni.

CYMA President chuan Zohnahthlak hmun hrang hranga awm te in pumkhatna chu an ngaihpawimawh a nih thu sawiiin, tuna Burma ram chhung buainaa Zohnahthlak te tawrhna chu an hriatpui thu leh sorkar ang pawh a theih tawpa tanpuina kawng siam nise an duh thu a sawi a. YMA chuan Zohnahthlak te inpumkhatna chu a ngaih pawimawh ber a nih thu a sawi. 

Vanhnuailiana Group YMA huamchhungah hian Myanmar raltlan mi 5000 dawn an awm mek a, raltlante hi YMA in lo buaipuiin Zokhawthar hmuna Godown ruakah riahtir an ni.

Myanmar buaina avanga harsatna tawkte chhawmdawlna atan hian Central YMA chuan Rs. 55,10,3654 an dawng tawh a, Rs. 44,22,200 hman ral a ni tawh a ni.