Aizawl June 13, 2024 : Central YMA chuan naktip maia YMA Day vawi 89-na lo thleng tur pualin vawiin ni 13.06.2024 khan Damdawiin leh Home hrang hrangah chibai bukna an hlan kual.

Aizawl leh a chhehvelah Sawrkar leh Kohhran Damdawiin ah Rs.15,000/- theuh an hlan a, Home pathum ah buhfai an hlan bawk.

TBCC, Sakawtuichhunah Buhfai Bag 100 an pe a, a hlannaah hian Lalhmachhuana, President leh Fabian Lalfakawma, Assistant Secretary bakah CEC memberte an kal a.

TNT, Zuangtui ah hian Buhfai bag 50 pe in Prof. Lalnuntluanga, Vice President leh MS Ralte, Finance Secretary leh CEC dangte an kal.

OKM Home, Phunchawngah Buhfai bag 25 pe in Prof. Malsawmliana, General Secretary leh Roneihthanga, Treasurer bakah CEC memberte an kal bawk.

Heng bakah hian India ram chhunga state hrang hranga Mizo Welfare 16 hnenah Rs.15,000/- theuh an hlan bawk.