ZALEN June 12, 2025 : Central YMA chuan YMA Day vawi 90-na pualin Damdawi In leh Home hrang hrangah thilpek a sem a. Mizorama pawna Mizo Welfare thenkhatah a hlan bawk.

Kumtina tih thin angin Central YMA chuan India ram khawpui hrang hranga Mizo Welfare 17 hnenah YMA Day chibai bukna Rs.15,000/- theuh a pe a, Aizawl khawpui chhunga Sawrkar leh Kohhran Damdawi In 6 ah Rs.15,000/- theuh a hlan bawk. 

Vawiin ni 12.06.2025( Ningani) khan Tawngtai Bethel Camping Centre (TBCC), OKM Home leh Thutak Nunpuitu Team (TNT) ah te buhfai bag 50 theuh an hlan bawk. Heng buhfaite hi hruaituten a hmunah kalin an hlan a ni.

Central YMA chuan kumin YMA Day hi Pathianni a nih avangin Sub- Hqrs, Group leh Branch YMA te chu mahni remchan angin Inrinni (14.06.25) emaw Thawhtanni (16.06.25) emaw a hmang mai turin hriattirna a ti chhuak a. Hmun hrang hranga YMA Day hman pui turin Central YMA hruaitute leh Sub- Hqrs hruaitute pawh an zin chhuak hlawm ang. 

YMA Day vawi 90-na hlim tak leh tluang taka hmang turin YMA member zawng zawngte duhsakna a hlan a. YMA chu tlawmngai pawl, tanpui ngaite tanpuitu a nih angin YMA Day a lo thlen hian mahni huamchhung theuhvah chanhai, riangvai tanpui ngaite tanpui a, midang tana ke pen chhuak turin Sub- Hqrs, Group leh Branch YMA te a ngen a ni.