Aizawl January 27, 2023: Central YMA hruaitute leh Mara thalai pawl - Mara Thyutlia Py (MTP) hruaitute chu vawiin khan Central YMA Office ah an inkawm a. Inkawmna hi CYMA President R. Lalngheta chuan a kaihruai a, MTP Hqrs. atangin Asst. General Secretary N. Solomon Beihlothe leh Adviser leh hruaitu dang te an tel. 

Inkawmhonaah hian Mizorama tlawmngai pawl lian - YMA, MTP leh YLA te Mizo hnam inpumkhatna atan thawhho a tul thu an sawi a. Zo hnahthlak hnam hrang hrangte tawng vawnhim a tul thu leh inpumkhatna atan kan tawng tualleng Mizo tawng hman uar a tul thu te sawi a ni. Ram leh hnam humhalhnan thawhho tulna te leh ram hmasawnna hnathawh enpui chungchangah pawh inthuruala hmalak a tul thu te an sawi bawk. 

Hun remchangah kokim zawkin YMA leh MTP mai ni lo, Young Lai Association (YLA) hruaitute nen hun remchang hmasaah inkawmho a thawhhona siam dan kawng zawn nise an ti.

R. Lalngheta, President, Central YMA chuan thawhhona leh Mizo hnam inpumkhatna tha a awm theihna tura MTP hruaitute CYMA Office a an lo leng chu lawmawm a ti a. Inpumkhatna a awm loh chuan Mizo hnam dinchhuahna tak tak a awm loh thu a sawi. Central YMA CEC thutkhawm hnuhnung berah YLA hruaitute nen inkawmhona neih nise tiin rel a nih tawh thu a sawi bawk. 

Central YMA, MTP leh CYLA hruaitute hian kum 1998, 2004, 2006 leh 2016 khan inkawmhona leh thawhhona an lo siam tawh a. Kum 2016 khan Aizawl Sipai Lammualah Joint Cultural Meet pawh an lo hmangho tawh a ni.