Aizawl: Fisheries Deptt. chuan chakai leh chengkawl la puitling lo lutuk man a khap.

Thuchhuah siamin Fisheries department chuan tunlai hian luia nungchate, a bikin chakai leh chengkawl a lian leh a te pawh thliar lovin, ei tham mang loh thlenga man thin an awm tih hriat a ni a. Hetianga kan lui dung nungcha la puitling lo leh te lutuk kan man thin hian an inthlah kal zel tur tikhawlovin, kan lui dung ecosystem a tichhe mek zel a, a tawpah chuan rem mai thei an ni a, hetianga a lian leh a te pawh thliar lova uchuak tak leh nakin hun ngaihtuah miah lova luiding nungchate mana sumdawn nana kan hmang thin hi sawrkar chuan a ngaimawh hle tih an tarlang.

The Mizoram Fisheries (Amendment) Act, 2016 section-6 Sub-section(1) clause (e) leh (i) tlawhchhanin luidunga nungchate la puitling lo leh te lutuk (juvenile stage) man hi khap a ni a, a mantute pawh hrem theih an ni a, man palh an nih pawhin an awmna hmunah chhuah leh nghal tur a ni. Chakai leh chengkawl la puitling lo leh te lutuk te man thinte pawh man tawh lo turin a hriattir a, mipui pawhin leisak lo turin Fisheries chuan a ngen a ni.