ZALEN, Mar. 05, 2025: Mizorama kût ngaihhlut ber, Chapchar Kût lo thleng tur pualin Falkawna Zo Khuaah Mizo nun dan pho chhuah mek a ni a, tlawhtute mit pawh a tlai hle.

Ni nga chhung kût lawmna puala hun hman mek kal zelah Art & Culture Department huaihawtin Nilaini leh Ningani hian nilengin ‘Mizo Typical Life - Live Demonstration’ buatsaih a ni a. Hman lai Mizo nun dan chu a taka chang chhuakin lantir a ni.

Aizawl daia Zo Khuaah hian hman lai Mizo nuna thil awm hrang hrang pho lan niin lal mualah naupangte an tualchai a, zawlbukah tlangval an inbuan a, thirdengin a pumah thir a deng a, nulaten thing an phur a, lalnu leh lalpa bakah mi naran chhungkua, hmeithai leh tlangau hmuh tur a awm bawk.

Hman lai Mizo nun dan lantirna hmun tlawhtu tleirawl pakhat chuan, “Zirlai atang ringawta kan lo hriat thin kha a tak ang chiahin kan hmu thei a, a tha ka ti a, chhiar ringawt ai chuan ka fiah phah hle,” tiin ZALEN a hrilh.

A buatsaihtu, Art & Culture Department hotute chuan Zo Khua awmna chhehvela tlawmngai pawlte nen tanghovin hetiang hi an buatsaih tih an sawi a. Hman lai naupang anga nunchan lantirtute chu Govt. Muallungthu Middle School-a zirlaite an ni a, puitlingte chu Falkawna tlawmngai pawl hrang hrang member-te an ni tih an sawi.

ZALEN-in a tlawh lai hian tlawhtu pawh an tam hle a. Heng zingah hian ICFAI University-a history zirlai leh an zirtirtute bakah KTP Rorel Inkhawm hmanga Wales atanga Mizoram tlawhtu, KTP dintu, Rev. O.W. Owen-a fapa pawh a tel.

Falkawna Zo Khua hi kum tam tak kal tawha department-in a din niin zirlai bakah hnam dang, Mizoram tlawhtuten an tlawh nasa hle niin a hmun nghaktu chuan ZALEN a hrilh.

“Tlawhtu zat erawh sawi mai a har a, ni tin tlawh an awm a, a chang chuan tam deuh chang te, a chang chuan tlawhtu tlem deuh ni pawh a awm,” a ti.

Chapchar Kût 2025 hi Thawhtanni atang khan Aizawlah chuan hman tan niin a hmanna pui ber erawh Ningani leh Zirtawpni hian Sipai Lammualah neih a ni ang.