Aizawl August 23, 2024 : Vawiin khan MZP Headquarter, Lunglei Emergency Meeting chuan Chakma pawn chhuah khap chu tun dinhmunah tih tawp rih nise tiin a rel a ni.

Meeting chuan August 17, 2024-a Mausen leh Tlawng inkara sumdawng lo suamtu Chakma panga (5) te Lungin-ah khung an ni tawh a. August 19, 2024-a Borapansury-a Mizo Police kut-thlaktute chhuina neih mêkah case ziah luh a ni tawh bawk a, hemi bakah hian 'Magisterial Inquiry' din anih tak avangin Chakma pawn chhuah khap hi tlai dar 4:00 p.m atanga tih tawp rih a rel a ni.

Meeting chuan thuneitute hmalakna chu en zui zela thil tisualtute man vat an nih theih nan a tul anga hmalak zel nise tiin a rel bawk a ni.

Mizo Zirlai Pawl Headquarters, Lunglei chuan Chakma pawn chhuah khap chungchanga Mizo mipuite thlawpna chu lawmawm a ti a, ram leh hnam humhalhna kawngah theih tawp chhuaha mipuite nena hmalak zel anih theih a beisei bawk a ni.