Aizawl: November ni 26-28,2019 inkar chhung hian Chalfilh (Vanzau) ah hmarchhak bial bullet khalhtute intawhkhawmna '11th North East Riders Meet' neih a ni dawn.

North east Riders meet neih tur chungchangah hian nimin khan a thlengtu tur Aizawl Thunders chuan an inbuatsaihna chungchang Aizawl Press Club ah thuthar theh-darhtute an hrilhfiah a. NERM-ah hian hmar-chhak state mai bakah hmun hrang hrang atangin riders 2000 vel an tel dawn niin an sawi a. Bullet khalhtu hetiang zat zingah hian engemaw palh a awm theih avangin Mizo mipuite chu hawihhawm taka mikhual te lo dawngsawng turin an ngen tih an sawi a. NERM thlenna tur Chalfilh tlang chu an chei nasa tawh tih sawiin an thil chei te a chhiat loh nan November thla chhung hi chuan midangin tlawh tawh lo thei se an duh tih an sawi a, meet an thlenna atan Chief Minister leh midang dang a hlawhtlinna atana puitu zawng zawng chungah lawmthu an sawi bawk.

Zawhna chhangin Aizawl Thunders hruaitu te chuan meet an neihna atan hian Rs. 94,40,000 an ruahman niin an sawi a. In register lo te chu meet ah hian tel a rem dawn lo nia sawiin programme hlim-awm tak tak an buatsaih bakah Khanpui leh East Phaileng ah te charity ride neih an tum tih an sawi bawk.