Aizawl; National Green Tribunal (NGT) in Chalfilh Tourist Destination thiat tura Mizoram sawrkar a rawn hriattirna chu Mizoram sawrkar in Supreme Court ah appeal a thehlut a, hearing neih hun tur erawh hriat a la i lo.

Tarlan tawh thin angin, NGT, Eastern Zone Bench, Kolkota chuan January 19, 2022 khan thupek chhuahin, Chalfilh tlang Vanzaua Tourist Destination siam chu May 17, 2022 hmaa thiat turin Mizoram sawrkar a rawn hriattir nawn a, hun tiam chhunga thiah a nih loh chuan NGT Act, 2010 angin a kaihhnawih officer ten dan an hmachhawn a tul tur thu a rawn hriattir tel bawk a ni.

Hetiang hi NGT thuchhuak ni mahse, vawiin thlengin Mizoram sawrkar chuan Chalfilh Tourist Destination thiat turin kutthlakna a la nei lo nia hriat a ni a, NGT thutlukna hi Supreme Court ah appeal in, hearing neih hun tur erawh a la hriat loh niin ZALEN thudawnna chuan a sawi.

Chalfilh Tourist Destination siamnaah hian environment/forest clearance lak a nih loh avangin NGT chuan November 17, 2021 khan thla khat chhunga thiat tur leh hmanrua /hnawmhnawk zawng zawng senghawi vek tur te, Chalfilh tlang chu a awm dan ngai anga awmtir leh turin thupek a lo chhuah tawh a. He thupek hi Mizoram sawrkar chuan tidanglam tur leh thiat lo a, a ngai anga awm phalsak turin a ngen a, mahse NGT chuan May 17, 2022 hma a thiat turin thu a pe leh ta zawk a ni.

Chalfilh Tourist Destination ah hian building leh structure hmun riat a awm a, sakna property awm zawng zawngte hlut zawng chu cheng nuai 759 man hu a ni.