Aizawl; Chalfilh tlang, Vanzaua in sak, Tourist Destination thiat turin Mizoram sawrkar a inbuatsaih tan nia thudawn a ni a, thiahna tur atana sum senso ngai zat turte pawh ruahman a ni mek nia hriat a ni.        

National Green Tribunal (NGT) Eastern Zone Bench, Kolkota chuan January 19, 2022 khan Chalfilh Tourist Destination chu May 17, 2022 hmaa thiat tur leh a hma anga awm tir leh turin Mizoram sawrkar a hriattir a, hemi chungchangah hian Mizoram sawrkara Tourism department leh PWD lam chuan thiat turin ruahmanna an siam mek niin ZALEN chuan thu a dawng.

Tourism department leh PWD lam hian Vanzaua in sakte thiahna atana sum senso ngai zat tur budget estimate pawh an ruahman mek nia hriat a ni bawk.

Chalfilh Tourist Destination thiahna tur thupek NGT-in November 17, 2021-a a chhuah hnuah Mizoram sawrkar chuan thupek tidanglam tur leh, thiat lo a, a ngai anga awm phalsak turin a ngen a, he ngenna hi NGT chuan pawm lovin thiat ngei turin thupek a chhuah leh ta zawk a ni.

Hemi chungchangah hian Khanpui khawtlang hruaitute chuan Chalfilh tlanga in sak vangin ramngaw a chereu phah loa an hriat thu leh thiahin awmzia nei loa an hriat thu ZALEN an hrilh a, sawrkar hotute pawh dawr an tum thu te, thiat tura hmalakna a awm a nih chuan theih-tawpa dodal an tum thu an sawi.
    
Chalfilh Tourist Destination: NGT

Environment/forest clearance lak a nih loh avangin November 17, 2021 khan thla 1 chhunga thiata senghawi vek turin Mizoram sawrkar a hriattir.

Sawrkar hmalaknate a thlalak nen January 7, 2022-ah NGT a thehlut turin a ti.

Sawrkar chuan December 16, 2021 khan NGT ah ngenna thlenin, January 7, 2022 khan hearing neih a ni.

NGT  chuan January 19, 2022 khan May 17, 2022 hma a thiat turin thupek a chhuah.