LBS Suzuki All Mizoram Inter Village Football Tournament final chu vawiin ni 19, 2022 khan Champhai Kanan leh Sialhawk ten khelin 2-0 a Sialhawk hnehin Champhai an champion.

Tunhma lamin Champhai Kanan hi Mizoram pum huap football inelnaah an la champion ngai lo va, khua leh veng hrang hrang team 204 zet telna Intervillage inelna a final an vawi khat luhnaah an champion thei nghal hi team tha tak an ni tih a chiang reng mai. 

Inter Village football hian boruak a nei lianin mipui hlut a hlawh hle a, mi tam takin local football a rawn kir leh ni hialin an sawi. Final-a intum tur team pahnih hi Aizawl atanga tla km tam tak kal ngai an ni ve ve a, chutichungin fans an haihchham lo. Inkhelh tan hma darkar thumah AR Lammual a khat der tawh a, Lammual hmar lamah kawr var ha Champhai fans thuin chhim lamah kawr pawl ha Sialhawk fans an thu bawk a, an thawm a ring dun hle a ni.

Inkhelh tan tirh atangin game a tang nghal a, final a nih piah lamah mipui lam atangin pressure a sang nghal hle a, field a tui hul loh vangin player tan ball control a harsain ball a tleu thin vangin nidanga an game an phak loh phah deuh niin a hriat. 

Champhai Kanan tan MFA Cup best player nilai midfield-ah Lalramsanga a hmuhnawm a, player tlan chak Tharpuia leh a nau Zozoa te an hlauhawm thei hle bawk. Sialhawk lamah mid-fielder Crespo Vanlalhriatpuia a tal na hle a, Sialhawk captain Danmawia erawh Champhai Kanan captain C. Lalchhawnkima leh a nauten an din chilh hneh bawka nidang angin a hlauhawm tawk lo. 

Team hnih te an inveng tawn a,  goal hlauhawm an nei lawk lo. Champhai Kanan lamin minute 15-na bawrah chance nei mahse goal-ah an chantir thei lo va, a hnu deuhah Sialhawl lamin hun tha nei vein Sialhawk long shot Champhai keeper-in lo dan tum mahse a ban phak lova a goal-ah a lut, mahse Danmawia ball tauh luh tumin keeper zuang lai hi a taksaa a lo dan deuh vangin referee-in foul-ah a ham a, goal-ah a pawm lo. First-half ah goal a lut lo. 

Second-half tan hnu minute 60-ah Tlanzova cross ball chu Ramdinthara'n mawi takin goal-ah a thun. Sialhawk lamin theih tawp chhuahin an nawr let a, an goal phurh sut ngai an tum a, mahse an thei mai lo. Goal luh belh lovin hun a tawp mai dawn a a lan laiin Tlanzova'n penalty a hlawh chhuak a, goal 12 thuna top scorer nihna hauh mektu Ramdinthara rawn pen chhuakin tun tournament-a a goal 13-na tur a khung leh a, 2-0 in hun a tawp.  

Champion : Champhai Kanan VC (Rs. 1,50,000 leh trophy)
RunnersUp : Sialhawk VC (Rs. 1,00,000 leh trophy)
Semi-finalist : Lengpui VC leh Ramhlun North LC (Rs. 40,000) 
Fair Play : Sialhawk VC (Rs. 20,000)

Mimal lawmman : 
Best player : Lalramsanga, Champhai Kanan (Rs. 10,000 leh trophy) 
Top scorer : R. Ramdinthara, Champhai Kanan, 13 goal (Rs. 5,000 leh trophy)
Best goalkeeper : R. Lalhmangaihzuala, Lengpui VC, 7 clean Sheet (Rs. 5,000 leh trophy)