Aizawl: Mizoram sawrkar chuan Central YMA te palaia a hman hnuah Champhai DC Maria CT Zuali chu a hna chelh hun chhung chu February 28, 2020 thleng pawhsei a intiam avangin Champhai District Joint NGO Coordination Committee chuan January 26, 2022 thleng awm tura tih Maria CT Zuali an dan chu Zirtawpni tlai khan an titawp nghal.

Champhai District Joint NGO-a tel zinga Champhai Thalai Pawl president Lalnunsanga Fanai hnen atanga ZALEN thudawn danin, Tuna Champhai DC ni mek CT Zuali hi Fianancial Year kal mek hi awm tluan thei se an duh tih chu sawrkar aiawha palai CYMA chu an lo hrilh tih a sawi. Sawrkar aiawha dawngsawngtu Dy. Chief Minister Tawnluia chuan transfer hi nikum lam atanga tihfel tawh a ni thu leh tunhnai thil a tih a nih lo thu te sawiin, sawrkar hian ni 15 bak hun pek belh hi harsa an ti thung a, mahse, CYMA lam hian sawrkar pawh inpawt fan tura nawrpuiin Champhai lam pawh an tawlh turin an ngen ve bawk a, February thla chhung chu DC hian thutchilh zui turin thu an ti tlu ta tih a sawi.

Thudawnna hian DC hi a cham tur hun sawrkarin a tiam hun a pelh hunah chuan harsatna siam tawh lova an chhuah mai tawh tur thu a sawi bawk 

Champhai District Joint NGO chuan hemi chungchangh hian thuchhuah siamin, Kan movement-ah kan duhdan puitling vek lo mah se, hemi huna dan palzutna leh dikna rorelna tundin kawnga kan hmalakna in awmzia a neih ngei kan beisei tlat a, hetiang harsatna leh dinhmun khirhkhana kan awm la leh Dikna in rorel se tia hma kan lak laia mipui aiawha kan thlante'n aw an rawn chhuah lo erawh chuan kan rilru a tina hle thung, an ti.

"Kan ram retheihna ata chhanchhuahna kawng pawi-mawh Indo-Myanmar Border Trade Centre (Zokhawthar Land Custom Station) a dan anga sumdawnna kalpui a nih theih nana CYMA thuchhuak, 25th January 2022 anga CYMA hmalak tum dan hi Champhai District NGO chuan kan thlawp tlat a. A taka hlenchhuak tura ke rawn pen ngei tur pawhin kan duhin kan ngen nghal bawk a ni," an ti bawk