Aizawl: Champhai District Bawrhsap thar Maria C.T Zuali chuan Zirtawpni khan MJA Champhai District Member-te chu a Pisa-a lengah sawmin inhmelhriatna leh inkawmna hun a hmanpui.

DC thar Maria C.T Zuali chuan Champhai district chu district nuam leh mawi tak, sik leh sa nuam, a mi chengte pawh Mizona thilung pu a vawnghim tlattu te nia a hriat thu a sawi a. "Sawrkarin scheme leh programme thar a kalpui tur reng rengah mipuite rilru sukthlek siam rem hmasak phawt a tul a, hemi tur hian Print leh Electronic Media kaltlanga zirtirna pek hmasak a tangkai a ni," a ti a. Chanchinbumite chu Sawrkar Scheme puanzar kawnga a kila lung tangkai tak an ni tiin, ram leh hnam rawngbawl hna thawka inpekna thinlung putute chu chhuanawm a tih thu a sawi a ni. Champhai Deputy Commissioner thar chuan MJA member-te atanga Champhai district hmasawnna kawnga tul leh hmabak awmte, district tana kalphung tha zawk tur ni a hriat thlente chu ngaihthlak sakin, mamawh leh rawtna thlente chu lo zirchianga a tul ang zela bawhzui anih tur thu a sawi a ni.

He hunah hian Bawrhsap tawiawmtu Dr.Lallawmkima, DIPRO Chanmphai chuan Champhai district chhunga Media kaltlanga hnathawh hrang hrang te tarlangin, chanchinbumiten sawrkar tha taka an tawiawm thin thu leh thawhhona tha tak an neih thu a sawi a ni. Champhai District MJA President Lalhmingmawia Pachuau chuan pawl member-te hmelhriattirna neiin, Champhai Bawrhsap thar lakah district mipuiten beiseina sang tak an neih thu leh a awm chhunga Champhai district tana thil hriatreng tlak hnutchhiah tum turin MJA Champhai district in an beisei thu a sawi a. Champhai district tih hmasawn leh changtlung kawngah theihtawp chhuaha tawiawm tlat an tum thu a sawi bawk.

MJA Champhai district hi kum 1972 ah Champhai Journalist Association (CHJA) ti a din a ni a, kum 2006 khan Mizoram Journalist Association zawmin, MJA Champhai District tih a lo ni ta a ni. Tun dinhmunah member 14 an awm mek a ni.