ZALEN June 17, 2025 : Horticulture Department buatsaih Horticulture Fair 2025 chu vawiin khan Aijal Club Park-ah neih a ni a. He hunah hian C. Lalsawivunga, Horticulture Minister chu Khuallian niin Fair hi a hawng a, he hunah Best Horticulture Farmer leh Best Performing Horticulture District lawmman sem a ni.

Minister C. Lalsawivunga chuan a hawnna program-ah thu sawiin, Horticulture Fair changtlung taka buatsaih a ni thei chu lawmawm a tih thu leh a buatsaihtute hmalakna fakawm a tih thu a sawi a. Mizorama thar chhuah thlai, thei leh pangparte, eitur sawngbawl sa (processed food) te zau zawka ram pawna thawn chhuah a nih theih nan Horticulture Department-a mithiamte leh kuthnathawktute an tan ruala, an inthlunzawm that tlat a tul thu a sawi a. Mizoram economy tihchangtlungna atan thlai thar sawngbawl (processing) leh a hralhna tur (marketing) ngaihtuah kawngah tan lak nasat a ngaih thu a sawi bawk. 

Hawmmna inkhawm Aijal Club-a neihah Best Horticulture Farmer atana thlan mi 11 te hnenah C. Lalsawivunga, Minister leh Ramdinliani, Special Secretary te’n lawmman an hlan a. Lawmman dawngtute chu:

1. Laldinthara, Aizawl

2. Lalrinsanga, Lunglei

3. HC Lengkhara, Siaha

4. Lalremruata Hmar, Champhai

5. PT Lalnunmawia, Kolasib

6. Lalneihsanga, Serchhip

7. Joshua, Lawngtlai

8. Thansangi, Mamit

9. Lalchungnunga Pachuau, Saitual

10. B. Thanliana, Khawzawl

11. Lalzuimawia, Hnahthial

Kum danga tih ngai loh Best Performing Horticulture District lawmman pawh siam thar a ni a. District ti tha ber atan Champhai leh Saitual District-te thlan niin, Khawzawl District-in a dawt a, Lunglei District chu pathumna a ni a, Minister chuan District tithate hnenah hian lawmman a hlan a ni. 

Horticulture Fair hian ni 4 (June 17-20, 2025) chhung a awh dawn a. Thlai, thei, pangpar leh a kaihhnawih hmanrua leh processed food-te phochhuahna stall 205 siam a ni a. Horticulture Fair buatsaih tan tirh kum 2012 atanga nikum 2024 thleng khan Horticulture Fair atanga sum hmuh tawh zat chu Rs. 3,46,30,607 a ni.