Aizawl: Mizoram sawrkarain IAS leh MCS officer a siksawi kuala lungawi lo, Champhai Joint NGO chuan an DC Maria CT Zuali sawrkarin sawn chhuah a tum chungchangah tun thleng sawrkin an thu leh hla te bengkhawn lo a, an la ngawi reng chu hriatthiam a harsa an ti a, intham lohna lian taka an ngai. Champhai Joint NGO te hi Inrinni zan khan an thkhawm a, Dawr Inkhar hmanga lungawi lohna chungchang te an thlir let a, chutihrualin an ruahman sa angin kal chhunzawm an tum a, Sub-Headquarter YMA erawh an hai rih.

   Thu dawnna in a sawi danin Champhai Sub-Hqrs. YMA hi he hmalaknaah hian an tel tawh lo a, sawrkar hmalakna dodal chu YMA kalphung nena inmil chiah loh avanga hai niin hriat a ni a, Joint NGO hmalakna erawh an thlawp tho niin thu dawn a ni.

    Champhai Joint NGO ten Zirtawpni khan Champhai Khawchhunga dawr zawng zawng inkhar tura ruahmanna an siam chuan zawm a hlawh em avangin chawhnu lamah chuan dawr khar pawh tih tawp a ni a, naktuk hian kawngzawh huaihawt tur a ni, Thawhlehni hian sorkar pisa zawng zawng khar tur an ti a, Republic Day-ah hian total bandh neih ni nise an ti a, Republic Day boycott an tum.

    Hetianga ruahmanna an siam tawh chung pawha ngaihthah an la ni reng hi an hre thiam thei lo a, nizan khan an kal leh zel dan tur ngaihtuahin an thukhawm a, he thu buatsaih lai thleng hian an thutlukna hriat hman a ni lo.

    ZALEN zawhna a chhan naah Joint NGO committe member zinga mi chuan, an thutlukna tur hi a hriat loh thu a sawi. An MLA lam ten engtiang takin nge hma an lakpui an hriat loh thu a sawi bawk. Thudawnna chuan kan thu leh hla awmzia a nei lo lutuk chu mak an tih thu leh tawngkam khat pawha sawrkar lamin thu an nei duh loh chu hriatthiam har an tih thu bakah, an DC an sawn chhuah chhan pawh an hrilh duh lo chu inthamloh thlaka a ngaih thu a sawi.

    “Kan duh dan kan thlen vek tawh a, an pawm loh zawng a nih pawhin chiang takin min hrilh mai se, kan awmdan tur pawh a chiang mai tur a nia, mahse, an ngawi tlat a, keini pawh kan duh danin kan kal ve mai hi a ngai a ni," a ti

    January 13, 2022 khan Mizoram sawrkar chuan thuchhuah (Order) tichhuakin IAS officer pathum leh MCS officer sawmpahnih te awmna chu a siksawi a, Champhai, Kolasib, Mamit, Serchhip leh Siaha DC te pawh an awmna sawn zingah an tel. January 17, 2022 atangin an hna thar hi zawm tura tih an ni bawk. Hemi hnu hian sawrkar chuan a thuchhuah hmasa hi January 20, 2022 khan a cancel leh a, Serchhip DC tih loh district dang DC an sawnchhuah te hi chu an awmna ngaiah Republic Day chu hmanpui vek turin a ti leh ta zawk.