Aizawl June 13, 2023 : Mizoram Legislative Assembly Election 2023 atana hman tur Electronic Voting Machine (EVM) leh Voter Verifiable Paper Audit Trail (VVPAT) te chu Champhai, Serchhip leh Lawngtlai District-ah te vawiin leh nimin khan endik a ni.

EVM leh VVPAT First Level Checking (FLC) nei tur hian a siamtu Electronics Corporation of India Limited (ECIL) atangin engineer ten an kal chilh. Election official-te leh political party aiawh te hmuh laiin khawl te hi inthlannaa hman tlak a nih dawn leh dawn loh an endik a. Endikna pal tlangte hi chhinchhiah thlap niin, khawih danglam theih loh turin strong room-ah kalh hnan zel a ni.

Champhai bikah hian EVM/VVPAT khawl thar endikna User Acceptance Test (UAT) neih niin, hemi kaltlang hian CU 10 leh VVPAT 20 te endik niin, avaiin a tha vek a ni. Vawiin khan EVM khawl endik hna hmasa ber, First Level Checking (FLC) kaltlang hian naktuk atangin EVM/VVPAT thar leh inthlan hmasa lama hman tawhte enfiah a ni.

Serchhip District hian tun dinhmunah Ballot Unit (BU) 154, Control Unit (CU) 187 leh VVPAT 150 an neih a, khawlte hi Political Party aiawhte hriatpuinain a vawn thatna hmun atanga lakchhuah niin ECIL Engineer-te kaihhruainain endik an ni. A endik thawhkhatna (FLC) hi tun kar chhunga zawhfel hman tum a ni a, chumi hnuah heng khawlte hi an hmantlak ngei em tih finfiah nan vote thlak chin runpui (Mock Poll) neih chhunzawm leh a ni dawn a ni.

Lawngtlai-ah hian tun inthlannaa hman tur hian khawl thar - EVM Ballot Unit (BU) 6, Control Unit (CU) 50 leh VVPAT 10 a thleng a, he'ngte hi hman theih a nih leh nih loh enchhinna, user acceptance test (UAT) chu DC Conference Hall-ah buatsaih hmasak a ni a. CU pakhat tih loh chu a tha vek a. He'ng UAT pal tlang khawl tharte bakah, khawl hman tawh sa te nen, a zavaiin BU 282, CU 330 leh VVPAT 296 chu vawiin atang khan FLC endikna kalpui tan niin, Inrinni thleng khian ni tin zing dar 9 atanga zan dar 7 thleng FLC hi kalpui tura ruahman a ni.