Aizawl: Nimin khan Champhai District Level Task Force on Covid-19 chu an Chairman leh Bawrhsap ni bawk Mark Lalthanliana hovin DC Conference Hall-ah an thukhawm a. Inkharkhip hman chhunzawm anih hnua hmalak zel dan tur leh inkaihhruaina dan hrang hrang zawm tur chungchang an rel.

DC chuan ramri depa awm an nih avangin ramri depte ven uluk zual ngai tih sawiin thuawihlo a dan palzutte chu dimdawi an nih loh tur thu a sawi a. Sawrkar Pisa te mipuite rawngbawlna khaihlak chuang lova kalpui theih dan tur ruahman a ni, a ti bawk. SP Rex Zarzoliana Vanchhawng chuan ramri depah thla 1 chuang Police an dah tawh thu leh khaw 18 a hmun 28 ah te an duty mek thu a sawi.

Meeting chuan thil zuartu te uchuak taka an thil zawrh hralh lo tura ngenin, Bazar-na hmunah metre 1 vel tala inhlat nise, veng/khaw chhunga inkalpawh phalna VLTF ten an pe thei anga, District chhung leh District inkar chu DC leh Incident Commander kutah dah a ni a. State pawn atanga bungraw lakluh chungchangah nitin eibar la tur tan DC Office-ah dilna siam nise, bungraw dangte erawh DC kaltlanga Home department lama dilna siam nise an ti.