Mizoram-a Basketball inelna League lian leh ngaihhlut hlawh ber Mizoram Super League (MSL) season 7 chu Zirtawpni zan khan tan niin match hmasa berah Mission Veng Hotshots ten an khingpui Chanmari Vikings an hneha, nizan khan champion tum Tuikual South chuan an match hmasa berah 88-73 in an khingpui Chawnpui an hneh ve bawk.

R. Dengthuama Indoor Stadium, Mualpui-a inkhel-ah hian Tuikual South lamin bul tan thain point lamah erawh an chungnung thei bik lo. Tuikual innghahna ber tur American player Darrell Bowie chuan bul tan chiah lo mah se a rawn luh phat atangin boruak a rawn siam nghal a, nawr pawh an nawr nat phah deuh. Hnam dang mamawh ve lo Chawnpui team an fakawm, midum player palian tan hmun a siam tha duh bik lo, Lallianmawia, Laltlanhlua leh Zodina Chawngthu te an ding khawng tlata first quarter-ah Chawnpui lamin hma hruaiin 19-18 points thunin hun an hmang zo.

Quarter hnihnaah Chawnpui lam an hnufual hret a, Tuikual South lam erawh an thawh hona a tha tulh tulh thung. Second quarter a zawh meuh chuan Tuikual South hian point sarih a hmahruai falin 26-19 in hma an hruai. First half chawh a ni a, third quarter-ah Chawnpui team ten tan an rawn khawh thar a, Tuikual South player te hi an inthlahdah deuh nge, an tang hleithei lo. Chawnpui lamin  point 6-a hmahruaiin 20-14 in hnehna an chang. 

Fourt quarter-ah pawh Mizo tlangval rual Chawnpui an phur a, bul an tan tha leh hle. Tuikual South lamin an midum player Darrel Bowie an chhawr tangkai a, Lalnunpuia nena an inkawp chu Chawnpui lamin an dang hleithei lo. Tuikual South-in 30-15 quarter an khar. Hun tawpa Tuikual South point hmuh belh khawm chu 88 a ni a, chaklo zawk Chawnpui team-in point 73 an hmu. 
 
MSL-ah hian team ruk awmin league match vawi hnih theuh an inkhelh kual hnuah point hmusang paliin play in (Semi-final) an khel leh ang a, final lut team hnih te chuan final (Best of three) an khel leh dawn a ni. Zanin hian team tha pahnih Khatla TBL leh Zarkawt BCA te an inhmachhawn ang.