Hmar Martar Ni hman a ni

Aizawl: Nimin kha Hmar Martyrs’ Day vawi 20-na a ni a, he ni hi Sinlung Hills Council (SHC) chuan an Headquarter Sakawrdai-ah ­mi pawimawh sawm bikte nen hman a ni.
SHC Chief Executive Member (CEM) Lalthlamuana Hmar leh Executive Member Ricky Lalremsanga ten an hmanpui a, mipuite hnenah thuchah sawiin martarte hriatrengna lungphunah zahna pangpar an dah bawk a ni.
Hmar Martyrs’ Day vawi 20-na pual hian Sinlung Hills Council huam chhunga khaw tinah martarte zah entir nan in tinah a thei theiin puan dum an zar a ni.

THISEN PE

Nimin khan Civil hospital, Aizawla damlo mamawh a piangte hman atan TKP, Bawngkawn Bial in thisen unit 34, KTP, Chaltlang South Branch ten unit 18 leh mimal tlawmngai ten unit 17 an pe a, nimina Civil hospital a thisen pek hi a vaiin unit 69 a ni. Nimin vek khan Chanmari West Branch KTP ten a thawh thum nan Synod Hospital Blood Bank-ah thisen unit 13 an pe bawk.

HLAWH THAWH TUM

Mizoram Secondary School Teachers’ Association (MISSTA) chuan COVID-19 dona atan an member-te chuan May thla hlawh Basic Pay atangin 5% an thawh dawn. Hei hi May 12, 2020-a COVID-19 avanga contribution thawh chungchanga Chief Secretary hova Recognized Service Association hrang hrangte meeting thuchhuak bawhzuina a ni.