ZALEN, Mar. 26, 2025: Home Minister K.Sapdanga chuan, “Thuthar thehdarhtute hnen aṭanga sawrkar fakselna ka hmuh hian ka lawm thin a ni,” a ti.

Mizoram Journalists’ Association (MJA)-in I&PR Auditorium, CHANEM Building, Champhaiah Nilainia General Conference vawi-51-naah Vanglaini chanchinbu editor thin hi khuallian niin a hmanpui.

Home minister chuan thuthar thehdarhtute chu mipui rorelna sawrkar lungphum palina (4th Estate of Democracy) an nih angin sawrkar fakna ziak kur nguai lova a kal dan dik lote pawh ziaka fakseltu ni zel turin chanchinbumi kalkhawmte a chah a. Thuthar thehdarhtute hnen atanga sawrkar fakselna a hmuha a lawm thu thu a sawi.

Mizoram mamawh ber chu siam tharna (reformation) nia a hriat thu a sawi rualin he mi kawnga tan la thar turin MJA member-te chu a chah a. Khawtlang kal dan, politics leh mipuite rilru sukthlek siam that kawngah te chanchinbumite chu thawhhlawk thei ber tura a ngaih thu pawh sawiin, “Ziak ngeia dah thu chuan chungchuanna bik a nei a ni,” a ti.

MJA prominent journalist ni mek, Sapa chuan digital media chak tawh tak karah print/traditional media-ten harsatna an tawk mek a ni tih a hriatpui thu leh heng kara chanchinbu tichhuaka soft copy tal pawha an chhuah thin chu fakawm a tih thu a sawi a. “Chanchinbu sem leh tihchhuah dan chu eng pawh ni se, a enkawltute ngaihtuahna leh thawhrimna lang thin hi a ropui ber lai chu a ni,” a ti.

MJA President C. Lalrambuatsaiha pawhin he hunah hian Mizo hnam inpumkhat a pawimawh thu a sawi a. An member-te chu teirei peihna leh insumtheihna nei turin a fuih bawk.

MJA General Conference vawi 51-na hi C. Lalhmachhuana, Vice President, MJA General Headquarters-in a kaihruai a. Kum 2024-25 chhunga an member thi pali sunna hun an hmang a. Prominent journalist thar - K. Zothankhuma, Editor, Virthli; T. Lalhmachhuana, Editor, Dingdi leh CS Chawngchhuma, Editor, Hnamdamna te hnenah chawimawina an pek a ni. Journalist pension-te hnenah ngaihhruina thilpek an hlan bawk.