ZALEN May 20, 2025; Khawzawl District-a Chawngtlai khua naupang pahnih chu Pathianni tlai khan electric-in a man a, Khawzawl District Hospital-ah dah luh an ni.

May ni 18, 2025 Pathianni tlai khan Chawngtlai naupang pathum chu Chawngtlai Presbyterian biakin chhak lawka khamah lawnin lung tohlawtah an awm a, an awmna lung tohlawt atang ban phak maia Tualte khaw eng pekna electric hrui chu an zinga pakhat Lalsangkima Pachuau, S/o PC. Hranghmingthanga (9) chuan khawih palhin current-in a man a, a bula awm Lalnunsangi D/o C. Chawngkunga (11) chuan chhan tumin a vuan a, an awmna atang hian an tla ta a, an zing a tel ve Thlamuanpuia S/o Jerry Zorammuanpuia vengpui erawh vanneih thlak takin a him thung a ni, an mangang au thawm hi Tlangthanmawia, Chawngtlai Phaiveng chuan hriain a han bawihsawm nghal a, hmeichhe naupang zawk hi hun engemaw chen chu nikhaw hrelovin a awm a, vanneihthlak takin hun rei vak lovah a harh chhuak leh mai a. Hemi zan la la hian Khawzawl district Hospital panpui nghal an ni a, tunah hian damdawiinah enkawl mek niin ngaihtuahawm lutuk an ni lo.

Chawngtlai naupang chetsualna hmun hi tunhma lam atang tawha naupang len vahna thin a ni a, he lai khama lung tohlawt atanga khawih phak maiah hian Tualte khua eng pekna hruipui (electric line) kal phei hi nimin khan electric department hnathawktute leh khawtlang mitlawmngai ten an enfiah nghal a, mipui tana a him zawk theih dan tur enhovin a theih ang angin hma an la nghal a ni.

#ZalenNews