South Africa atanga lak luh cheetah 12-te chu Madhya Pradesh thlenpui an ni ta a, a hma thla riatah khan zawhte lian chi hi Namibia atangin lak luh an lo ni tawh bawk. 

Air Force thlawhna hmangin cheetah-te hi Inrinni chawhma dar 10:00 khan Gwalior Air Force base thlenpui an ni a, helicopter-in Kuno National Park-a phurh thlen leh nghal an ni.

A pa pasarih leh a nu panga an ni a, park-ah hian khung hranna, quarantine enclosure-ah Madhya Pradesh Chief Minister Shivraj Singh Chouhan leh Environment Minister Bhupender Yadav ten an chhuah zui dawn a ni.

Quarantine enclosure hi 10 ruahman a ni a. Indian wildlife law-ah ramsate hi ram dang atanga luhpui an nih atangin ni 30 tal dah hran tur a ni.

September thla khan Namibia atangin cheetah pariat lak luh an lo ni tawh a. Prime Minister Narendra Modi chuan Kuno National Park-ah vek hian a piancham, September 17-ah a chhuah a ni.

Namibian cheetah-te hi tunah chuan ramsa an pelh theihna hmun, hunting enclosure-ah awm tawhin hei hi sq km ruk vela zau niin anmahniho awm khawmna a ni a, ram hnuai tak takah chhuah theih an ni tep tawh.

india & cheetah

India-a cheetah awm hnuhnung ber hi kum 1947-a thi niin kum 1952 khan a riral tawh tih puan zui a ni.

Zawhte lian hi ram chhunga awmtir leh tuma hmalak a ni a, kum 2020 khan Supreme Court chuan a chi peng dang, African cheetah chu ‘uluk taka an awmna tur thlana duanah’ dah tura lak luh phalna a tichhuak.

Project-ah hian 12-14 vel lak luha India-a tihpun tum leh a ni a, hei hian kum erawh a duh deuh dawn a. South Africa, Namibia leh African ram dang atangin an neih dan azirin kum nga awm tur chhunga lak luh turin ruahmanna siam a ni.

Nikuma Namibia atanga lak luh kha ramsa, khawmualpui dang atanga khawmualpui danga sawn hmasak ber a ni nghe nghe.