Khawvel infiamna lar leh darh zau ber football thiam tur hian naupanlai atangin nasa taka inzir a ngai thin a, chutiang tur chuan club hlun chin chuan naupang chherna tur academy changtlung tak an nei deuh vek bawk. Chung zingah chuan, Chelsea pawh hi telin khawvel huap pawha zahpuiawm loh tak a ni. An academy hi inkaihhruaina tha tak nei an ni a, an inenkawlna hi world-class a nih mai bakah coaching staff tha tak tak an nei. 

An academy atang hian Allan Harris atanga John Terry thlengin footballer thahnem tak, football khawvel-a hming dai ngai tawh lo tur an lo chawr chhuak tawh a ni. Thomas Tuchel-a naute zinga mi Mason Mount leh Reece James te pawh hi Chelsea academy atanga zir chhuak ngat an ni bawk.

Vawiina kan rawn tarlan tur te hi kan hming hriat lar tak tak Mount leh Terry te lam ni lovin Stamford Bridge atanga zir chhuak mah se an club-in an chhawr lem lova club danga par chhuah ta player 4 kan han tarlang dawn a ni:  

#3 Marc Guehi - Crystal Palace
Marc Guehi hian Chelsea academy hi Cray Wanderers atangin kum 2007 khan a zawm a, he centre-back hi a rawlthar chuah atang renga lar sa a tih theih awm e. A kum rualpuiah chuan defender hmahun eng ber pawl a ni. Guehi hian loan hmangin season khat leh a chanve Swansea City lamah 2019-20 leh 2020-21 season khan a khel a. Vanduaithlak takin Stamford Bridge-ah hian first team-ah a khel phak tlat lo.

2021 nipui khan Blues lam hian Crystal Palace lamah €23.3 million in an hralh chhuak a, Patrick Vieira hnuaiah Premier League khelin Guehi hi Vieira defender rin ber pakhat a ni. 2021-22 chhung khan Palace tan Premier League game 36 khelin goal hnih a thun a, assist a nei bawk. 

#2 Tammy Abraham - AS Roma
Chelsea hian player tha a ngaih Romelu Lukaku leh Timo Werner  an nei chungin goal thun an harsat hle a, anni pahnih hian goal an thun hlei thei lo. Hetih lai hian AS Roma lama an thawn liam tak Tammy Abraham erawh season liamta 2021-22 chhung khan a che tha hle thung.  

Abraham hian 2004 khan Chelsea youth academy a zawm a, hetih hunlai hian kum 6 mi chauh ala ni. Mi inzirmi tak a ni bawka a thiam chak hle a, 2013 chuan Chelsea Under-18 team tan a khel phak der a, striker hian hma sawn chho zelin club tan Under-21 leh Under-23 lamah a khel chho zel a, 2017 chuan senior team tan a khel phak der. 

Striker lar leh hming chher sa an lak luh thin avangin Tammy Abraham hian hmun a chang hlei thei lova, loan hmangin Swansea a pan a, Aston Villa lamah a lut leh. 

Kum 2019 leh 2021 khan Chelsea tan a khel nasa hle a, game 82 a khelhah goal 30 a thun chungin Chelsea lam chuan an la iai deuh ni tur a ni 2021 nipui lai khan  Abraham hi AS Roma lamah an thawn leh tya rih. Kum 24 mi hian a season hmasa berah game 53 khelin goal 27 thuin assist 5 a nei bawk. 

#1 Declan Rice - West Ham United
2006 khan kum sarih mi lek a nih laiin, Declan Rice hi Chelsea youth academy-ah a inziak lut a. Kum 7 chhung zet Chelsea-ah hian a inchher hriam hnuah Rice hian West Ham United youth academy chu kum 2013 khan a zawm ve leh. 

Rice hi tunah an ram England leh West Ham United tan a khel mek a, khawvel defensive midfielder tha ber a ni mek. Rice hi a thiante tana goal thun tur siamtu player tha tak a ni. Kum 23 mi hian Hammers tan kum hnih contract a la

West Ham United coach David Moyes-a erawh chuan Rice hi chhuah a tum rih lo hle thungin a lang a, a midfielder hi an lachhuak duh a nih chuan £150 million an pek a ngaih tur thu a sawi hmiah mai.